प्रकाश सपूत र परीक्षा लिम्बु स्टारर फिल्म 'सोल्टिनी' को छायांकन सकिएको छ।
इलाम बजार, बिब्ल्याटे, कन्याम, बिर्तामोड, पथरी र भोजपुरका दृश्यहरू कैद गर्दै ३६ दिनमा फिल्मको छायाकंन सकिएको हो। भोजपुरको अन्नपूर्ण गाउँमा भएको यसको 'इन्ड क्ल्याप' दृश्यमा कलाकारहरू परीक्षा लिम्बु, सब्बु गुरूङ, कविता आले, सुजाता गुरूङ र प्रेम सुब्बाले अभिनय गरे।
निर्देशक अर्जुन सुवेदीले फिल्म 'सोल्टिनी' को छायांकन समयमै सकिनुको मुख्य कारण पूर्व तयारी रहेको बताए। 'सशक्त स्क्रिप्ट, अनुभवी कलाकार र कुशल प्राविधिक टिमकै कारण हामीले निर्धारित समयभित्रै छायांकन सम्पन्न गर्न सफल भयौं,' सुवेदी भन्छन्, 'फिल्मको प्रत्येक दृश्यलाई सुन्दर बनाउन हामीले छायांकन स्थलको राम्रो अवलोकन गरेका थियौं। इलाम बजारदेखि भोजपुरसम्मका विविध स्थानहरूको चयनले कथालाई जीवन्त बनाउन मद्दत गर्यो।'
अब 'सोल्टिनी' को सम्पादन प्रक्रियामा टिम प्रवेश गर्नेछ। निर्देशक सुवेदीले दर्शकलाई फरक स्वादको कथासँग जोड्न फिल्मले कुनै कसर बाँकी नराख्ने बताए। यस फिल्मले समाजमा व्याप्त अमानवीयता र जातीय भेदभावका विरूद्ध आवाज उठाउनेछ। साथै दुई प्रमुख पात्रबीचको प्रेम कथा पनि यसको मुख्य आकर्षण रहनेछ।
फिल्ममा प्रकाश सपूत, विल्सन विक्रम राई, परीक्षा लिम्बु, सब्बु गुरूङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा रहेका छन्। सपूतले 'भीमसेन पोखरेल' र लिम्बुले 'दिलासा राई' को मुख्य भूमिका निभाउने फिल्मको घोषणामा नै बताइएको थियो। यो जोडी पहिलो पटक एकसाथ पर्दामा देखिन लागेको हो।
फिल्मको संगीत प्रशान्त सिवाकोटी र हर्कुलस बस्नेतले दिएका छन् भने छायांकन सुशन प्रजापतिले गरेका छन्। प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा बनेको फिल्मका निर्माताहरू रेजिना विस्ट र संसार चौलागाईं हुन्। ट्राइडेन्ट कन्सेप्टले पब्लिसिटी डिजाइन गरेको छ भने आरआर फिल्म्स प्रालिले नेपाल वितरण गर्नेछ। डिजिटल अधिकार ओएसआर डिजिटलले खरिद गरेको छ।
यो फिल्म संविधान दिवसको अवसर पारेर असोज ३ गते प्रदर्शन गर्ने लक्ष्य राखिएको छ।
