सफल फिल्म 'होस्टेल' को तेस्रो संस्करण 'होस्टेल ३' को नयाँ प्रदर्शन मिति घोषणा गरिएको छ।
यसअघि फागुन १६ का लागि तोकिएको प्रदर्शन मिति स्थगित गरिएको फिल्म त्यसको एक साता पछि रिलिज हुने भएको छ।
शुक्रबार एक पोस्टर सार्वजनिक गर्दै फिल्म फागुन २३ गते रिलिज हुने घोषणा गरिएको हो। यो मितिमा नेपाल सहित अन्य विभिन्न देशहरूमा प्रदर्शनमा आउने निर्देशक सशान कँडेलले बताए।
फिल्मको पहिलो झलक देखाउने पोस्टरमा चार मुख्य पात्रहरूलाई रमाइलो मुद्रामा देखाइएको छ, जसले फिल्म हास्यरसमा आधारित रहेको संकेत गर्छ। पोस्टरमा फिल्ममा प्रमुख पुरूष पात्रहरूले बास्केटबल कोर्टमा रमाइला गतिविधिहरू गरिरहेको देखिन्छ। यी चार मुख्य पात्रहरूमा आशिष घिमिरे, पारस बम (कुलब्वाई), रिहान गिरी र पदम तामाङ छन्। यो पोस्टर राकेश दाहालले डिजाइन गरेका हुन्।
'होस्टेल ३' ले क्याम्पस जीवनका संघर्ष, मित्रता र रमाइलो क्षणहरूको कथा समेट्ने अपेक्षा गरिएको छ।
फिल्मको स्क्रिप्ट माधव शर्माले लेखेका हुन् भने कथा निर्देशक कँडेलकै हो।सम्मान इन्टरटेनमेन्टले आरोन कन फिल्म्ससँगको सहकार्यमा निर्माण गरेको फिल्मको निर्माताहरू कर्ण कार्की र गोविन्द अधिकारी, सह–निर्माता सुरेश कँडेल तथा कार्यकारी निर्माता शंकर कोइराला हुन्। ‘होस्टेल ३’ यसअघि प्रदर्शन गरिएका ‘होस्टेल’ र ‘होस्टेल रिटन्र्स’ को सफलतापछि निर्माण गरिएको हो।
फिल्ममा पारस, रिहान, आशिष, पदमसहित सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुषलगायतका कलाकारहरूको अभिनय छ।
अर्जुन तिवारीको डिओपी, बुद्ध थापा र मनोज खत्रीको सिनेमाटोग्राफी रहेको फिल्ममा सुदिप कुँवरको मुख्य सह निर्देशन छ।
फिल्मलाई नेपालमा आरआर फिल्म्स र काफिया फिल्म्सले वितरण गर्नेछन्।
