व्यवसायिक सफल फिल्म 'होस्टेल' को तेस्रो शृंखला पूर्वनिर्धारित मितिमा प्रदर्शनमा नआउने भएको छ।
फागुन १६ का लागि प्रदर्शन मिति तोकिएको 'होस्टेल ३' उक्त दिन रिलिज नहुने भएको निर्देशक सशान कंडेलले बताए।
उनले भने, 'सो मितिमा अन्य फिल्मको पनि भिड्भाड देखियो। मेहनत गरेर फिल्म बनाइरहेका छौं। बरू विदा कम भएको समयमा आउने तर अन्यसँग नजुध्ने निधो गर्दै पोस्टपोन्ड गरेका छौं।'
फिल्मको गीतको छायांकन भइरहेको बताउँदै उनले नयाँ प्रदर्शन मिति छिट्टै घोषणा गर्ने बताए।
'होस्टेल ३' को पूर्वनिर्धारित प्रदर्शन स्थगित गरिएसँगै महाशिवरात्रिको अवसरमा तीनवटा फिल्मको प्रतिस्पर्धा तय भएको छ। लाज शरणम्, मायावी र फेरि रेशम फिलीलीले फागुन १४ गतेलाई प्रदर्शन मिति घोषणा गरेका छन्।
'होस्टेल ३' को कुरा गर्दा यो फिल्मबाट केही कलाकारहरूले डेब्यु गर्दैछन्।
फिल्ममा 'कुल ब्वाय' अर्थात् पारस बम, रिहान गिरी, सिम्रन पन्त, पदम तामाङ, हेना नगरकोटी, आशिष घिमिरे लगायतले अभिनय गरेका छन्।
होस्टेलमा बसेर अध्ययन गरिरहेका टिनेजर र उनीहरूको भविष्यका घटनाहरूमा आधारित रहेर फिल्म निर्माण भइरहेको हो।
