यसरी भयो जोरपाटीको प्रहरी विटमा आक्रमण

प्रकाश ढुंगाना/नारायण महर्जन

जोरपाटीस्थित नयाँबस्ती प्रहरी बिट अगाडिको खाजा घरमा ट्याक्सी चालक राजकुमार तामाङ बेहोस अवस्थामा भेटिए।

दोलखाका तामाङ मापसे गरेर अचेत अवस्थामा लडिरहेका थिए। उनले चलाउने ट्याक्सी नयाँबस्तीको फुटसल नजिक ठोक्किएको अवस्थामा सडकमै अलपत्र थियो। स्थानीयले तामाङलाई बेहोस अवस्थामा भेटेपछि नेपाल मेडिकल कलेज अत्तरखेल पुर्‍याए। अस्पताल पुर्‍याएलगत्तै उनको मृत्यु भयो।

आइतबार बिहान स्थानीयले तामाङ बेहोस अवस्थामा भेटिएको खाजा घरमा तोडफोड गरे। स्थानीयको भीडले झडपको स्थिति आयो। उनीहरु छलफल गर्न प्रहरी चौकी पुगे।

प्रहरी बिटका इन्चार्ज थिए, असई विद्याधर चौधरी। उनको कमान्डमा त्यहाँ ७ जना प्रहरी कार्यरत छन्। विद्याधरले मृतकका आफन्तसँग छलफल गरिरहेका थिए। उनीहरुले प्रहरी चौकी अगाडि मानिस बेहोस अवस्थामा भेटिएको र थप अनुसन्धान गर्न प्रहरीलाई भने। विद्याधरले ‘प्रहरीले अनुसन्धान अघि बढाउँछ तपाईहरु ढुक्क हुनुहोस्’ भन्ने जबाफ दिए।

भीडमा एक जनाले 'प्रहरीले नै उनलाई मारेर फालेको' भनाइ आक्रोशित मुद्रामा राखे।

त्यत्तिन्जेल सई सन्जिव नापितको कमाण्डमा मोबाइल टोली बौद्धबाट त्यहाँ पुगिसकेको थियो। मृतकका आफन्तले प्रहरीमाथि आक्रमण गर्न थाले। प्रहरी कर्मचारीका दुईवटा र प्रहरीको एउटा मोटरसाइकलबाट पेट्रोल निकाले। अनि प्रहरीहरुलाई भित्र हुलेर आगो लगाउन प्रयास गरे। चारवटा मोटरसाइकलमा आगजनी पनि गरे। प्रहरी चौकीमा रहेको ग्यास खोले र बाल्न थाले। प्रहरी चौकी भित्र प्रवेश गरेर झ्यालका सिसा फुटाउन थाले, किचेनमा छिरेर सबै तोडफोड गरे।

आक्रोशित भीड बढ्दै गयो। प्रहरीले भीड नियन्त्रणमा लिन २२ राउण्ड हवाइ फायर गर्‍यो। पछि बौद्ध, गौशाला र महानगरीय नगर प्रहरीका डिएसपी सन्तोषसिंह राठौर थप प्रहरी टोली लिएर घटनास्थल पुगे। प्रहरीले आक्रमणमा संलग्न ३ महिलासहित २२ जनालाई नियन्त्रणमा लियो। भीड साम्य भयो।

यो क्षेत्रमा धेरै भट्टी पसल रहेको र त्यसलाई राति ८ बजे भित्रै बन्द प्रहरीले कडाइ गरेपछि त्यहाँ केही भट्टी सञ्चालकहरु तामाङको विषय उठाएर आफूहरुमाथि प्रतिशोध साध्न खोजेको प्रहरीले आरोप लगाएको छ।

‘तामाङको विषयलाई लिएर प्रहरी चौकी आक्रमण नै भएको होइन,’ काठमाडौं प्रहरी परिसरका एसपी प्रद्युम्न कुमार कार्कीले भने, ‘उनको बहानामा रिस साँध्न आक्रमण गरिएको हो।’

प्रकाशित मिति: 2016-12-11 17:32:58

प्रतिक्रिया दिनुहोस्