यात्रुबाहक बसको ठक्करबाट धरानमा आज एक जनाको मृत्यु भएको छ।
मृत्यु हुनेमा धरान– ८ का हेमन्त गुरुङ रहेको सुनसरीका प्रहरी नायव उपरीक्षक विनोद घिमिरेले जानकारी दिए।
धरानबाट इटहरीतर्फ आउँदै गरेको ना ४ ख ५३८७ नं को यात्रुबाहक बसले विपरीत दिशाबाट आउँदै गरेको को १६ प ४९३० नं को स्कुटरलाई धरान उपमहानगरपालिका– ८ मा ठक्कर दिँदा स्कुटरमा सवार गुरुङको मृत्यु भएको हो ।
बसको ठक्करबाट गम्भीर घाइते भएका गुरुङको धरानस्थित बिपी कोइराला स्वास्थ्य विज्ञान प्रतिष्ठानमा उपचारका लागि लैजाने क्रममा बाटोमा मृत्यु भएको प्रहरीले जनाएको छ ।
ठक्कर दिने बस र त्यसका चालक प्रहरी नियन्त्रणमा रहेको छ । रासस
