लेखनाथ अर्घौंचोकमा शनिबार राति दुई वटा मोटरसाइकल आपसमा ठोक्किँदा लेखनाथ-२का ३४ वर्षीय ज्ञानबहादुर पुनको मृत्यु भएको छ। राति करिब साढे १२ बजेतिर ट्राफिक प्रहरी जवान पूर्णबहादुर दरै र लिलबहादुर पुन सवार लु१९प ४९४१ नम्बरको मोटरसाइकल र ग११प ७३९३ नम्बरको मोटरसाइकल ठोक्किँदा पुनको घटनास्थलमै ज्यान गएको हो।
दुर्घटनामा परेका ट्राफिक दरैको अवस्था गम्भीर रहेको र मणिपाल शिक्षण अस्पतालमा उपचार भइरहेको जिल्ला प्रहरी कार्यालय कास्कीका डिएसपी गजुसिद्धि बज्राचार्यले बताए। ती दुई मोटरसाइकल आपसमा ठोक्किएर अनियन्त्रित हुँदा अर्को एक ग१०प ३२९१ नम्बरको मोटरसाइकलका चालक समेत सामान्य घाइते भएका छन्। घटनामा ज्यान गुमाएका पुनको शव पोस्टमार्टमका लागि पश्चिमाञ्चल क्षेत्रीय अस्पताल राखिएको छ।
मृतक ज्ञानबहादुरको परिवारले घटनाको निष्पक्ष छानबिन माग राखेका छन्। उक्त मागसहित उनीहरुले कास्की प्रहरीमा निवेदन गरेका छन्। घटनामा संलग्न ट्राफिकलाई कारबाहीको दायरामा ल्याउने जिल्ला प्रहरी कार्यालय कास्कीका प्रमुख एसपी घनश्याम अर्यालले बताए।
दुर्घटना पछाडिको कथा
ट्राफिक प्रहरी जवान पूर्णबहादुर दरै र ज्ञानबहादुर पुनको चिनजान करिब तीन वर्षअघि भएको हो।
ज्ञानबहादुरले ट्राफिक दरैलाई प्यारो भाइ भन्ने गर्थे। दरै पुनको घरमा आउने जाने गर्थे। शनिबार दिउँसो ३ बजे दरै लगायत अन्य ट्राफिक प्रहरीलाई ज्ञानबहादुरले खानपिनमा जाने निम्तो दिएका थिए। दरैले आफू काम सकेर आउने बताए।
दरै ट्राफिक कार्यालयभित्रकै ब्यारेकमा बस्छन्। साँझ ७ बजे ज्ञानबहादुर आफ्नो ग१०प ३२९१ नम्बरको बुलेट बाइक लिएर दरैलाई लिन आए। दरै पनि काम सकेर उनको मोटरसाइकल चढेर महेन्द्रपुलतिर गए।
ज्ञानबहादुरसँगै आफन्त गोविन्द पुन र लिलबहादुर पुनलगायत थिए। ज्ञानबहादुरले सबैलाई ट्राफिक दरैसँग चिनजान गराए। उनीहरूसँगै घुमघाम र खानपिन सँगैगरी दोहोरी साँझ रेस्टुरेन्ट पनि गए। राति १२ बजेतिर उनीहरुले घर फर्कने निधो गरेर पृथ्वीचोक आए।
दरै ब्यारेकमा आएर जुत्ता खोली चप्पल लगाएर आफ्नो लु१९प ४९४१ नम्बरको पल्सर मोटरसाइकलमा फेरि निक्लिए। ज्ञानबहादुर आफ्नो बुलेट बाइक नचलाई म्यादी घर भई हाल लेखनाथ–३ अर्घौचोक बस्ने ३२ वर्षीय लिलबहादुर पुनले चलाएको ग११प ७३९३ नम्बरको पल्सर पछाडि बसेका थिए। ज्ञानबहादुरको बुलेट बाइक भने गोविन्द पुनले चलाएका थिए।
अर्घौंचोकमा पुगेपछि कोही रिट्ठेपानीतिर जाने त कोही बुढीबजारतिर जाने भएकाले बाइक साट्न त्यही चोकमा रोक्नुपर्ने थियो। करिब साढे १२ बजेतिर अर्घौचोकमा गोविन्दले चलाएको बुलेट अघि रोकियो उनकै पछि लिलबहादुर आएर पल्सर रोके। त्यत्तिकैमा ट्राफिक दरैको बाइक आएर लिलबहादुर र ज्ञानबहादुर चढेको पल्सरमा ठोक्कियो।
ज्ञानबहादुर उछिट्टिएर सडकमा बजारिए। ज्ञानलाई सबै भएर उठाएर सडक छेउमा राखे। ज्ञानको घटनास्थलमा मृत्यु भइसकेको थियो। प्रहरीलाई खबर गरियो। प्रहरी दरै पनि गम्भीर घाइते भए।ज्ञानको शव पश्चिमाञ्चल क्षेत्रीय अस्पतालको शव गृहमा राखिएको छ।
(पत्रकार गिरी पोखरामा सेतोपाटी डटकमको सहयात्री पत्रिका समाधान दैनिकका संवाददाता हुन्।)
