निर्वाचित भएको तीन साता बितिसके पनि प्रधानमन्त्री दाहाल अझै बधाईमै व्यस्त छन्।
प्रधानमन्त्री निवास बालुवाटारमा बिहान डेढ घण्टा लगाएर ४० वटा संस्थाका प्रतिनिधिबाट उनले बधाई ग्रहण गरेका छन्।
लाइनमा उभिएर बधाई दिन पुगेकामध्ये कतिपयले बधाईका साथै संस्थागत र व्यक्तिगत समस्या अवगत गराएका थिए।
त्यसक्रममा उनले व्यक्तिगत समस्या अवगत गराउने अपाङ्गता भएका व्यक्ति र एकल महिलाले बुझाएका मागपत्र कोटको खल्तीमा राखेका थिए।
समस्या राख्ने क्रममा नेपाल र राष्ट्रिय अभिभावक संघले शिक्षा मन्त्रालयमा सचिव तथा शिक्षा विभागका महानिर्देशकको व्यवस्था गर्न उनको ध्यानाकर्षण गराएका छन्।
सचिव र महानिर्देशकको अभावमा शिक्षा क्षेत्रका काम प्रभावित भएको भन्दै तत्काल सचिव र महानिर्देशकको व्यवस्था गर्न उनीहरुले ध्यानाकर्षण गराएका हुन्।
शिक्षा मन्त्रालय एक महिनादेखि सचिवविहिन छ भने विभाग महानिर्देशकविहिन भएको दुई साता बितेको छ। सरकार गठन भएको तीन साता बितिसके पनि शिक्षा मन्त्रालयमा मन्त्रीको पद पनि खाली छ।
राष्ट्रिय अभिभावक संघका अध्यक्ष धर्मदत्त देवकोटाले सार्वजनिक विद्यालयको गुणस्तर सुधार निकै चुनौतिपूर्ण रहेको अवस्थामा मुलुकको शिक्षा क्षेत्रको नेतृत्व गर्ने मुख्य पद लामो समय रिक्त नराख्न प्रधानमन्त्री दाहालको ध्यानाकर्षण गराएको बताए।
