नेपाल विद्युत प्राधिकरण वितरण केन्द्र जनकपुरले विश्वप्रसिद्ध जानकी मन्दिर लगायत विभिन्न मठ मन्दिर, अस्पताल एवं सरकारी कार्यालयको लाइन काटेको छ ।
महसुल नबुझाउने उपभोक्ताको बिजुली काट्ने अभियान अन्तर्गत जानकी मन्दिर, लक्ष्मण मन्दिर, रामजानकी विवाह मण्डप, जनकपुर अञ्चल अस्पताल, मैक्स प्लाष्टिक उद्योग तथा सडक डिभिजन कार्यालयको विधुत लाईन काटिएको विद्युत प्राधिकरण जनकपुर वितरण केन्द्रका प्रमुख जितेन्द्र झाले बताए।
प्रमुख झाका अनुसार, जानकी मन्दिरले विगत ३० वर्षदेखि महसूल नबुझाएको र मन्दिरमाथि ६५ लाख भन्दा बढी रकम बक्यौता छ । यसैगरी लामो समयदेखि विधुत महसुल नबुझाएका लक्ष्मण मन्दिरमाथि १७ लाख, रामजानकी विवाह मण्डपमाथि साढे ७ लाख, जनकपुर अञ्चल अस्पतालमाथि६० लाख, मैक्स प्लास्टिक उद्योगमाथि साढे ५ लाख तथा सडक डिभिजन कार्यालयमाथि ३ लाख २५ हजार रुपैयाँ बाँकी बक्यौता छ।
जानकी मन्दिरका महन्थ रामतपेश्वर दास वैष्णवले पञ्चायत कालमा जानकी मन्दिर परिसरभित्र अञ्चलाधीश कार्यालय, प्रहरी कार्यालय, युवा क्लव तथा कराटे संघ लगायतका कार्यालय रहेको उल्लेख गर्दै त्यसपछि पनि मन्दिर परिसरभित्रै बृहत्तर जनकपुर क्षेत्र विकास परिषद्, जानकी मन्दिर जिर्णोद्धार समिति, मिथिला सांस्कृतिक केन्द्रलगायतका कार्यालय रहेको र ती कार्यालयले उपभोग गरेको विद्युत महसुल हालसम्म नबुझाएकाले सो वापतको वक्यौता रकम ठूलो देखिएको बताउए । विद्युत महसुल वापतको वक्यौता रकम माफीका लागि सम्बन्धित निकायमा आग्रह गर्ने पनि उनले बताए।
महन्थ दासले गुठी संस्थाबाट जानकी मन्दिरले पाउनुपर्ने मालपोत वापतको रकमबाट विधुत महसुल बुझाएर बाँकी रकम मन्दिरलाई उपलब्ध गराउन पहल गरिदिन हुन नागरिक समाजसंग आग्रह गरे। महन्थ दासका अनुसार, मालपोत दस्तुर वापत गुठी संस्थानले जानकी मन्दिरलाई डेढ करोड भन्दा बढी रकम तिर्न बाँकी छ । रासस
