अविश्वास प्रस्ताव खेपिरहेका प्रधानमन्त्री केपी शर्मा ओलीले आइतबार राजीनामा नदिए पदमुक्त हुने सम्भावना बढेको छ।
कार्यसूचीअनुसार आइतबार ११ बजेबाट सुरू हुने संसद बैठकका लागि झन्डै तीन घन्टा सांसदहरूलाई बोल्ने समय छुट्याइएको छ। नेपाली कांग्रेसका लागि चालीस मिनेट समय परेको छ।
त्यतिनै समय प्रमुख दलहरूले र बाँकी अन्य दललाई छुट्याइँदा बैठकमा तीन घन्टा भाषण हुने छ। त्यसपछि आधा घन्टाका लागि बैठक स्थगित हुने छ।
त्यो आधा घन्टापछि प्रधानमन्त्री ओलीले सरकारविरूद्ध उठेका प्रश्नहरूको जवाफ दिनेछन्। उनले दुई अढाई घन्टा जवाफ दिएपछि संसद बैठक अविश्वास प्रस्तावको निर्णयमा पुग्ने छ।
अविश्वास पक्षमा बहुमत सदस्य रहेको बुझेका प्रधानमन्त्रीले राजीनामा दिन्छन् दिँदैनन् त्यो अलग्गै प्रश्न छ, तर उनले राजीनामा नदिए अविश्वास प्रस्तावमाथि मतदान हुन्छ। मतदानतिर गएको खण्डमा बहुमत सदस्यको ध्वनी मतबाट प्रधानमन्त्री ओली पदमुक्त हुनेछन्।
आर्थिक विधेयकसमेत शुक्रबार संसदबाट अस्वीकृत भइसकेकाले संसदमा प्रधानमन्त्री प्रष्ट रुपमा अल्पमतमा छन्।
संविधानको धारा २९८ को उपधारा १३ बमोजिम अविश्वास प्रस्तावमा मतदान हुँदा बहुमत सदस्यले त्यसलाई पारित गरे संसद नियमावली १६० को ९ बमोजिम स्वतः पदमुक्त हुने व्यवस्था छ। सम्भवतः आइतबार नै सभामुखले नयाँ प्रधानमन्त्री चयनको प्रक्रियाका लागि राष्ट्रपतिलाई पत्र लेख्नेछिन्।
