ढाकामा बिद्रोही संगठन इस्लामिक स्टेट आइएसको आक्रमण परि ज्यान गुमाएकाको सम्झनामा बंगलादेश सरकारले दुई दिने राष्ट्रिय शोकको घोषणा गरेको छ।
आइएसले शुक्रबार राति राजधानी ढाकाको एक क्याफेमा आक्रमण गरी बन्धक बनाएर २० जनाको ज्यान लिएको थियो।
आक्रमणकारीले क्याफेमा आक्रमण गरी त्यहाँ रहेका मानिसलाई बन्धक बनाएर त्यसपछि हत्या गरेको खबर अन्तर्राष्ट्रिय सञ्चारमाध्यमहरूले जनाएका छन्।
ज्यान गुमाउनेमा दुई प्रहरी अधिकारीसहित अधिकांश विदेशी नागरिक छन्। घटनामा ३० जनाभन्दा बढी घाइते भएका छन्।
आइएस समर्थित ७-८ जना बन्दुकधारीले हिजो साँझ ढाकास्थित ‘होले आरटीसन बेकरी क्याफे’लार्इ आफ्नो कब्जामा लिएका थिए।
बंगलादेशी सुरक्षाकर्मीले १२ घण्टापछि उक्त क्याफेलार्इ बन्दुकधारीबाट मुक्त गरेको छ। १३ जनालाई १२ घण्टापछि सकुशल उद्धार गरेको थियो।
६ जना बन्दुकधारी मारिएका छन् भने एक जना पक्राउ परेका छन्। उक्त मुटभेटमा दुर्इजना प्रहरीको पनि ज्यान गएको छ।
एक जापानिज र दुर्इ श्रीलंकनसहित सुरक्षाकर्मीले १३ जनाको उद्दार गरेको बिबिसीले बताएको छ।
ढाकाको कूटनीतिक नियोगहरु नजिक रहेको उक्त क्याफे विदेशी र स्थानीय मध्यम बर्ग माझ लोकप्रिय रहेको छ।
घटनामा ज्यान जानेमा नौ जना इटाली, सात जना जापान, तीन जना बंगलादेश तथा एक जना भारतीय नागरिक छन्। यसैबीच अमेरिकी विदेश मन्त्रालयले मारिनेमा एक जना अमेरिकी नागरिक पनि भएको जनाएको छ। तर यस बारेमा थप जानकारी दिइएको छैन ।
बंगालादेशी प्रधानमन्त्री शेख हसिनाले दुई दिने राष्ट्रिय शोकको घोषणा गर्दै आतंकवाद विरुद्ध लड्ने प्रतिबद्धता जनाइन्।
आतंककारीको कुनै धर्म नहुने भन्दै प्रधानमन्त्री हसिनाले धर्मको नाममा हुने कुनै पनि आतंक स्वीकार्य नहुने बताएकी छन्।
यसैबीच इटालीको फुटबल टिमले आक्रमणमा मारिएको सम्झनामा फ्रान्समा चलिरहेको युरोकप अन्तर्गत आज बिहान जर्मनीसँगको खेल अघि मौन धारण गरेको थियो।
