काबुलमा भएको आत्मघाति बम विस्फोटमा परी १२ जना नेपालीको ज्यान गएपछि मृतकको शव ल्याउन र घाइतेको उद्धारका लागि नेपाल सरकारले चार्टर्ड विमान पठाउन लागेको छ।
यसैबीच सरकारले अफगानिस्तानको काबुलमा असुरक्षित रहेका नेपालीलाई स्वदेश आउन चाहेमा 'एयर लिफ्ट' दिने मंगलबार आयोजित पत्रकार सम्मेलनमा बताएको छ।
काबुलमा आत्मघाती बम विस्फोटमा मृत भएका नेपालीको शव र घाइते लिने जाने जहाजसँगै नेपाल फर्कन इच्छुकलाई पनि ल्याउने व्यवस्था गरिएको श्रम तथा रोगजार मन्त्रालयका प्रवक्ता गोविन्दमणि भूर्तेलले बताए।
उनका अनुसार सरकारले काबुल घटनाका मृतकको शव ल्याउनका लागि नेपाल वायु सेवा नियमको जहाज आज राति १० बजे पठाउन लागेको छ।
शव र घाइते लिन जाने जहाजमै राखेर फर्कन चाहने इच्छुक नेपालीलाई स्वेदश फर्काउन प्रबन्ध पनि मिलाएको भर्तेलले बताए।
यसअघि नै काबुल बम आक्रमणमा घाइते भएकामध्ये दुई जनालाई मंगलबार एयर लिफ्ट गरी थप उपचारका लागि नयाँ दिल्ली पुर्याइएको छ। बमले लागेर घाइते भएका चितवनका मानबहादुर थापा र चितवनकै कृष्णकुमार देउजालाई दिल्ली लगिएको हो। घाइते उनीहरुलाई दिल्लीस्थित एपोलो अस्पताल भर्ना गरिएको परराष्ट्र मन्त्रालयले जनाएको छ।
सरकारले अफगानिस्तानमा मारिएका १२ नेपालीको शव नेपाल ल्याउन शाही नेपाल वायु सेवा निगमको जहाजका लागि अफगानिस्तानसँग ल्यान्डिङ अनुमति तथा भारत र पाकिस्तानसँग आकासको अनुमति लिने काम गररिहेको छ।
सोमबार काबुलमा भएको आत्मघाती बम विस्फोटनमा १२ नेपालीसहित १४ जनाको ज्यान गएको थियो। घटनामा ७ नेपाली घाइते भएका छन्।
