नेकपा एमालेले प्रदेश सङ्गठन कमिटी गठन गर्ने निर्णय गरेको छ। आज बसेको एमाले स्थायी कमिटीको बैठकले संविधानमा व्यवस्था भए बमोजिमका सातवटै प्रदेशमा प्रदेश सङ्गठन कमिटी गठन गर्ने निर्णय गरेको सचिव योगेश भट्टराईले जानकारी दिए।
उक्त कमिटीमा सम्बन्धित प्रदेश अन्तर्गत भूगोलमा जिम्मेवारी तोकिएका केन्द्रीय सदस्यहरू, सम्बन्धित प्रदेश अन्तर्गतका जिल्ला कमिटीका अध्यक्षहरू, निवर्तमान अञ्चल सचिवहरू र निर्वाचित राष्ट्रिय प्रतिनिधि परिषद् सदस्यहरू-निर्वाचित महिला र दलित राष्ट्रिय प्रतिनिधि परिषद् सदस्यहरु सदस्य रहनेछन् ।
प्रदेश सङ्गठन कमिटीले १० प्रतिशतसम्म सदस्य मनोनयनका लागि केन्द्रीय कमिटीमा सिफारिस गर्न सक्ने उनले बताए । त्यसरी सिफारिस गर्दा निवर्तमान र पूर्व जिल्ला पार्टी प्रमुखहरू, निवर्तमान अञ्चल समन्वय कमिटी सदस्यहरू, पार्टीमा लामो योगदान भएका कमरेडहरू तथा पार्टीसम्बद्ध जनसङ्गठनका पूर्व केन्द्रीय पदाधिकारीहरूलाई प्राथमिकता दिइने भट्टराईले बताए।
पार्टी एकता र एकीकरण अन्तरगत पार्टीमा आवद्ध भएका व्यक्तिहरूमध्येबाट पार्टी विधान बमोजिम प्रदेश सङ्गठन कमिटीले २० प्रतिशतसम्म मनोनयनको सिफारिस गर्न सक्ने बैठकले निर्णय गरेको छ। स्थायी कमिटीको अर्को बैठक असार ९ गते दिउँसो ३ बजे बस्नेछ ।
