२०७२ साल कात्तिक महिनामा रुपन्देहीको तिलोत्तमा नगरपालिका मक्रहरका एकजना काठ व्यवसायीलाई फोन आयो- मैले भनेजती पैसा दिनू नत्र कुनैपनि बेला अपहरणमा परि ज्यान पनि जान सक्ने छ।
तत्काल उनले एकलाख ५० हजार रूपैया बुझाए र सम्भावित अपहरण र ज्यान जानबाट जोगिए।
कात्तिक महिनामै रूपन्देहीकै मणिग्रामका अर्का फर्निचर व्यवसायीलाई पनि सोहि प्रकृतीको फोन आयो। उनले पनि १ लाख ६० हजार रुपैया बुझाएर ज्यान जोगाए।
कात्तिक २२ गते रुपन्देहीको देवदह नगरपालिका वडा नं. ७ स्थित पुल हाउसमा पुल खेलिरहेका नारायण बस्नेतमाथि गोली प्रहार भयो। मोटरसाईकलमा गएका व्यक्तिहरुले बस्नेतमाथि गोली प्रहार गरी फरार रहे।
गोली प्रहारमा प्रयोग गरिएको मोटरसाईकल स्थानीय कजरार खोलामा फेला परेपनि गोली प्रहार गर्ने व्यक्तिहरु पक्राउ पर्न सकेनन्।
२०७२ सालको कात्तिक महिना यता मात्र रुपन्देहीको देवदह, सैनामैना, बुटवल र तिलोत्तमा नगरपालिका लगायतका क्षेत्रमा नौं जना व्यवसायीलाई अपहरण र ज्यानमार्ने धम्की दिई रकम असुल गर्ने सोहि गिरोहलाई ईलाका प्रहरी कार्यालय बुटवलले लामो प्रयास पछि पक्राउ गरेको छ।
आठजनाको समूहमा रहेको उक्त गिरोहले रुपन्देहीको देबदह, खैरेनी तथा आसपासको क्षेत्रमा अर्ध भूमिगत रहि लामो समयदेखी नदिजन्य वस्तु र काठको तस्करी गर्नुको साथै विभिन्न व्यवसायीहरुलाई अपहरण गरी तथा धाकधम्की दिएर रकम असुली गर्ने गरेको प्रहरीले जनाएको छ।
यसरी पक्राउ परेकामध्ये केहिले बिगतमा बिभिन्न अपराधमा संलग्न रहि अदालतबाट त्यसको सजायं समेत भोगिसकेको प्रहरी अनुसन्धानले देखाएको छ।
यसरी पक्राउ पर्नेमा देवदह ७ का शालिकराम चापागाई, देवदह ८ का राजेन्द्र धमाल, देवदह ६ का उर्गेन गुरुङ, देवदह २ का रवि केशी, देवदह १० का बेनिराम सोमै र देवदह २ का मिलन भन्ने चित्र बहादुर गुरुङ रहेका छन्।
त्यसैगरी कास्की जिल्ला पुरनचौर ८ का सन्जोष नेपाली, नवलपरासी सुनवल ६ का सिरिष अजय भन्ने ऋिषिराम घिमिरे समेत रहेको प्रहरीले जनाएको छ।
ईलाका प्रहरी कार्यालय बुटवलका प्रहरी उपरिक्षक महेन्द्र खड्काले पक्राउ परेका व्यक्तिहरुले पाल्पा, तनहुँ, पोखरा, रुपन्देही, काठमाडौं नवलपरासी, बारा र भारतका बिभिन्न स्थानमा लुकिछिपि संगठित रुपमा अपराध गर्ने गरेको अनुसन्धानमा देखिएको जानकारी दिए।
पक्राउ परेका व्यक्तिहरु विभिन्न व्यवसायीलाई अपहरण तथा मार्ने धम्कि दिई फिरौती रकम असुल्नुको साथै अन्य चोरी तथा लागूऔषध कारोबारमा समेत संलग्न रहेको प्रहरीले जनाएको छ।
प्रहरीले पक्राउ परेका व्यक्तिबाट अपराधिक कार्यमा प्रयोग गरिएका दुई थान मोटरसाईकल, पेस्तोलमा प्रयोग हुने दुई राउण्ड गोली र १ थान गोलीको खोका, १ लाख ३ हजार नगद, ५२ दशमलव २ ग्राम लागूऔषध ब्राउन सुगर, तथा एनसेलका २५, एनटिसीका ४ र भारतीय २ वटा सिमकार्ड सहित ११ वटा मोवाईल सेट बरामद गरेको जनाएको छ।
संगठित अपाराधीक घटनामा संलग्न रहेका आठै जनालाई संगठित अपराध नियन्त्रण ऐन र लागूऔषध नियन्त्रण ऐन अन्तर्गत र सालिकराम चापागाई र अजय शिरिषलाई हातहतियार खरखजना ऐन र मुलुकी ऐन ज्यान सम्बन्धि महल अन्तर्गत मुद्दा चलाउने प्रहरीले जनाएको छ।
लुम्बिनी अञ्चल प्रहरी प्रमुख बरिष्ठ उपरीक्षक शेरबहादुर बस्नेतले लामो अनुसन्धान पश्चात अभियुक्तहरुलाई पक्राउ गर्न सकिएको र यही समूहमा रहेका केही व्यक्ति विदेशमा लुकिछिपी बसेकोले उनीहरुलाई पनि छिट्टै पक्राउ गरिने बताए।
