डडेल्धुराको जिल्ला कारागारबाट गाउँले बीच भएको झगडा मिलाउन गएका प्रहरीलाई हँसिया प्रहार गरी साङ्घातिक आक्रमण गरिएको छ ।
शनिबार बेलुका गाउँले बीच भएको झगडालाई शान्त गर्न अमरगढी नगरपालिका–५ कीर्तिपुर बजार नजिक पर्ने जिलोडा गाउँमा पुगेका प्रहरीमाथि झगडालुले हँसिया प्रहार गरी दुईजना प्रहरीलाई घाइते बनाएको हो ।
झगडा शान्त गर्ने क्रममा जिलोडा गाउँमा पुगेका प्रहरी हवल्दार जगदीश पन्त र प्रहरी जवान पदम बोगटीमाथि हँसिया प्रहार गरी घाइते बनाएको जिल्ला प्रहरी कार्यालय, डडेल्धुराले जनाएको छ ।
गाउँलेसँग विवाद गरिरहेको जिलोडा गाउँका ४० वर्षीया धने ताम्राकारले प्रहरीलाई हँसियाले साङ्घातिक हमला गरेको घाइते भएका हवल्दार पन्तले बताए। हवल्दार पन्तको उपक्षेत्रीय अस्पताल डडेल्धुरामा उपचार भइरहेको छ भने हातमा गहिरो घाउ भएका जवान बोगटीलाई थप उपचारका लागि नेपालगन्ज अस्पतालमा पठाइएको उपक्षेत्रीय अस्पतालले जनाएको छ ।
हँसिया प्रहार गर्ने ताम्राकारलाई जिल्ला प्रहरीले हिरासतमा लिएको छ । घटनाको छानबिन गरी कानुन बमोजिमको कारबाही गरिने जिल्ला प्रहरी कार्यालय, डडेल्धुराले जनाएको छ । रासस
