राष्ट्रिय मधेश समाजवादी पार्टीका केन्द्रीय अध्यक्ष शरतसिंह भण्डारीले मधेश आन्दोलन अब १५/२० दिनमै टुङ्गो लाग्ने दाबी गरेका छन्।
महोत्तरी जिल्लाको जलेश्वरमा संघीय गठबन्धनले आयोजना गरेको विरोध सभालाई सम्बोधन गर्दै अध्यक्ष भण्डारीले भने, ‘मधेश अधिकारको लागि भइरहेको यो आन्दोलन अन्तिम हो १५/२० दिनमै टुङ्गो लाग्छ।’
अबको आन्दोलनमा संयुक्त लोकतान्त्रिक मधेसी मोर्चा, संघीय मधेसी गठबन्धनलगायतका सबै दल एक ढिक्का भएर लागेकाले अबको आन्दोलन अन्तिम र निर्णायक हुने उनले बताए।
उनले प्रधानमन्त्री केपी ओलीको सरकार असफल मात्रै नभई राष्ट्रघाति समेत रहेको आरोप लगाए। उनले अहिलेको प्रधानमन्त्रीलाई शारीरिक मात्रै नभई मानसिक रोगी रहेको आरोप समेत लगाए।
मधेसीलाई विखण्डकारी भन्ने ओली सरकार आफैं विखण्डकारी रहेको आरोप लगाउँदै उनले अब मधेश र मधेशीले विखण्डनकारीलाई कुनै पनि हालतमा नछाडने जिकिर गरे।
उनले तराई मधेसमा ६ महिनासम्म चलेको आन्दोलनको क्रममा मधेशी नेताहरुमाथि झुठा मुद्दा लगाएर मधेशको आन्दोलनलाई सरकारले कमजोर बनाउन खोजेको बताए।
मधेशी नेतामाथि लगाइएको झुठा मुद्दा फिर्ता नभएसम्म वार्ताको औचित्य नहुने उनले तर्क गरे। ‘सरकारले वार्ताको लागि पठाएको पत्र नौटंकी मात्र हो, पहिले मधेसी नेता कार्यकर्ताहरु माथि लगाइएको मुद्दा फिर्ता होस्।’
६ महिनासम्म चलेको आन्दोलन मधेसको भूमिमा भएको भए पनि यो आन्दोलन राष्ट्रिय अधिकारको आन्दोलन रहेको र वर्तमान सरकारले मधेस आन्दोलनलाई बदनाम गराउन साम्प्रदायिकता फैलाएको उनको आरोप थियो।
