जङ्गलबाट फैलिएको डढेलो बस्ती पसेपछि गोरखाको सौरपानी गाविस–२ भैलाम गाउँका पाँचवटा घर जलेर नष्ट भएका छन्।
सोलिघोप्टेको खर्क सामुदायिक वनमा दिनभर लागेको आगो आज अपराह्न बस्ती पुगेपछि भूकम्पपीडितका पाँचवटा टहरा जलेको छ। अरु पाँचवटा टहरोमा पनि आगोले सामान्य क्षति पुगेको छ।
स्थानीयवासी र प्रहरी मिलेर आगो निभाउने काम भएको भइरहेको बताउँदै स्थानीय लक्ष्मण न्यौपानेले भने– 'आगोले घर खरानी बनायो।' हरिया स्याउला र माटोले आगो निभाउने प्रयास गरे पनि नसकिएको उनको भनाइ छ। गाउँमा पानी अभाव भएकाले पनि तत्कालै आगो नियन्त्रणमा लिन नसकिएको हो।
घर, गोठ जल्न सुरु भएपछि मानिस र घरपालुवा पशुपक्षीलाई सुरक्षित ठाउँमा सारिएको उनले बताए। 'भूकम्पले भत्किएको घरलाई टालटुल गरेर टहरो बनाएका थियौँ” उनले भने–'गाउँलेको बिल्लीबाठ भयो। के खाने, के लगाउने?” जङ्गलमा फैलिएको डढेलो बस्ती पसेको गाउँलेले ढिला गरी थाह पाएका थिए।
आगलागीले जस्तापाताले छाएको टहरो खरानी बनाएको छ। भूकम्पले चर्केका घर मर्मत गरेर भूकम्पपीडित बस्दै आएका थिए। स्थानीयवासी मकै गोड्न बारीमा गएका बेला डढेलो बस्तीमा पसेकाले धेरै क्षति भएको हो। 'आगो निभाउँदा तीन÷चारजना मान्छे सामान्य घाइते भए', उनले भने,'धेरै क्षति हुन पाएन।' भैलाम गाउँमा १० वटा घर थिए।
जिल्ला प्रहरी कार्यालय गोरखाका प्रहरी उपरीक्षक जनकराज पाण्डेयले आगो निभाउन प्रहरी टोली परिचालन गरिएको बताए। 'क्षतिको पूर्ण विवरण आइसकेको छैन,'उनले भने।रासस
