उपप्रधान तथा महिला बालवालिका एवम समाजकल्याणमन्त्री सीपी मैनालले भारत र युरोपियन यूनियनले निकालेको संयुक्त विज्ञप्तिको विषयमा सरकारले सम्बन्धित मुलुकका राजदूतहरुसँग स्पष्टिकरण लिने बताएका छन्।
रिपोर्टर्स क्लब नेपालले शनिवार आयोजना गरेको साक्षात्कारमा उनले भने,‘भारत र इयुको कुरा गलत भएकोले सरकारले उनीहरुलाई बोलाएको हो। मन्त्रीपरिषदको बैठकले निर्णय गरिसकेको छ। एक दुई दिनमै परराष्ट्र मन्त्रालयले उनीहरुलाई बोलाएर यस विषयमा बयान लिन्छ। ’
मैनालीले भारतीय राजदुत रञ्जित रेले होलीको अवसरमा मधेसी मोर्चाका नेताहरुलाई बोलाएर भारत मधेसीको साथमा रहेको भनि दिएको अभिब्यक्ति कुटनीतिक चरित्र नभएको भन्दै उनलाई कुटनीतिक मर्यादाभित्र रहन सचेत गराए। उनले भने,‘ राजदूतहरुले आफ्नो कुटनीतिक मर्यादा कायम राख्नु पर्छ। बढी गरे सरकारले सोध्छ। राजदूत कुटनीतिक मर्यादामा रहने हो यहाँ बसेर राजनीति गर्ने होइन। भारतीय राजदूतले नेपालमा बसेर राजनीति गरेका छन्।’
उपप्रधानमन्त्री मैनालीले ब्रसेल्समा नेपालको विषय एजेण्डा नबनोस भनेर सरकारले पहिला नै युरोपियन युनियनका नेपाल प्रतिनिधिसँग छलफल गरेको जानकारी दिए।
उनले भने,‘ब्रसेल्स बक्तब्य स्वभाविक होइन। कास्मिरमा पनि आधार भारतमा र आधा जनता पाकिस्तानमा बस्छौं भन्छन्। समस्याहरु भारतमा पनि छन्। तर त्यसलाई हामीले समस्या बनाएका छैनौं। भारतले किन हस्तक्षेप गर्ने? भारत आफै शिशाको घरमा बसेर अर्काको घरमा ढुंगा हान्ने काम गरिरहेको छ।’
उपप्रधानमन्त्री मैनालीले ब्रसेल्स बक्तब्य गलत र शान्ति विथोल्ने काम भएको भन्दै आन्तरिक विषयलाई बाहिर लानु उचित नभएको टिप्पणी गरे।
