भारतको जयनगर बसेर नेपालमा अपराधिक गतिविधि चलाउँदै आएका र सञ्चार उद्यमी अरूण सिंघानिया हत्याका योजनाकार चन्द्रदिप यादव उर्फ धर्ती सिंहलाई प्रहरीले बुधबार राति प्रेमीकासहित धनुषाको जनकपुर नगरपालिका १ स्थित वकिल टोलबाटबाट पक्राउ गरेको छ।
जनकपुर टुडेका प्रकाशक सिंघानियाको ०६७ फागुन २७ गते फागू पूर्णिमाको दिन जनकपुरको शिव चोकमा गोली हानी हत्या गरिएको थियो ।यसअघि प्रहरीले सिंघानिया हत्या आरोपमा तीन जना पक्राउ गरिसकेको छ। उनीहरुकै सूचनाका आधारमा यादवलाई पक्राउ गरिएको प्रहरी स्रोतले बताएको छ।
को हुन् यादव
आरोपित यादव गणेशमान चारनाथ नगरपालिका -६ का बासिन्दा हुन्। उनी दोस्रो संविधानसभामा फोरम लोकतान्त्रिकबाट चुनाव समेत उठेका थिए। उनले भारतको जयनगरमा बसेर सशस्त्र समूहसँग मिलेर नेपालमा अपराधिक गतिविधि चलाउँदै आएको प्रहरीले बताएको छ।
यादव माथि गत माघमा नेपाली कांग्रेसको जिल्ला अधिवेशनको क्रममा २ जनाको हत्या गरेको मुद्दा पनि छ । उनलाई अहिले जिल्ला प्रहरी कार्यालयमा राखिएको छ । केही महिनाअघि मात्र अस्तित्वमा आएको भूमिगत समूह जनतान्त्रिक टाईगर जनशक्ति पार्टीका केन्द्रीय अध्यक्ष चन्द्रदिप यादव उर्फ धर्ती सिंह हुन्।
धनुषाको भरतपुर गाविस ८ तथा हाल गणेशमान चारनाथ नगरपालिका २ राधापुर बस्ने विल्टु यादवका छोरा हुन चन्द्रदिप यादव । उनी अहिले सशस्त्र समुह जनतान्त्रिक तराई जनशक्ति पार्टीका केन्द्रिय अध्यक्ष हुन्। प्रहरीको मोस्ट वाण्टेड सूचिमा उनी छन्। सुरुमा उनी मधेस केन्द्रीत राजनीतिक दलमा आवद्ध थिए। २०६२/०६३ साल तिर प्रथम मधेस आन्दोलन हुँदा मधेसी जनअधिकार फोरम नेपालमा धनुषा जिल्ला सदस्य थिए। पछि फोरम लोकतान्त्रिकमा उनी जिल्ला सदस्य भए।
तर, संजय साहले छुट्टै मधेस क्रान्ति फोरम गठन गरेपछि उनी फोरम लोकतान्त्रिकमै रहि जिल्ला उपाध्यक्षको भुमिका पाएका थिए । उनी पार्टी भित्र जे जस्तो भुमिकामा रहेपनि संजय साहको अत्यन्तै विश्वाशिलो पात्र मानिन्थे।
पार्टी भित्र उनी दवंग छविका रुपमा चिनिन्थे । उदाहरण स्वरुप मधेसी फोरमको भातृसंगठन यूवा संघ धनुषाको जिल्ला अधिवेशन हुँदा उनी आफ्नै नेतृत्वमा उमाशंकर अरगरिया खेमाका कार्यकर्ताहरुलाई कुटपिट गरेका थिए।
पहिलो संविधान सभा निर्वाचनमा फोरम लोकतन्त्रिकका तर्फबाट धनुषा ६ बाट उनी प्रत्यक्ष तर्फबा उम्मेद्वार समेत थिए। यादव भौतिक योजनामन्त्री विजय गच्छेदार र जनकपुर बम विस्फोटका योजनाकार सञ्जय टक्लाका नजिक मानिन्छन्। जनकपुर बम विस्फोट र सिंघानीया हत्याको अनुसन्धान थालेपछि टक्ला, यादव र अर्का रामविनोद यादवसँगै फरार भएका थिए।
टक्ला अहिले डिल्लिबजार कारागारमा छन्। रामविनोद भने अझै फरार छन्। पछिल्लो क्रममा यादवले जनतान्त्रिक टाइगर जनशक्ति पार्टीको नामबाट अपराधिक कार्य गर्दै आएका थिए। उनी त्यसका अध्यक्ष समेत हुन्। यादव माथि माघ २२ मा धनुषामा राजेन्द्र प्रासादको हत्या गरेको आरोप समेत छ। यस्तै धनुषा विरेन्द्र बजारमा नसिद मियाँ र राम सोघारत महतोलाई गोली हानेको आरोप समेत उनलाई छ। फागुन ६ मा उनको पार्टीका सैन्य प्रमुख रामरिझन यादव र कैलाश ठाकुर पक्राउ परेका थिए।
फोरम लोकतान्त्रिकमै रहेका अर्का सदस्य पवन मण्डल काठ तस्करी गर्ने कार्यमा उनको साझेदार रहेको के बाट पनि पुष्टि हुन्छ भने जिल्ला बन कार्यालय धनुषाले अवैध काठ तस्करी गरेको आरोपमा चन्द्रदिपका दुई पटक काठ सहित टयाक्टर समातेका थिए । यसका अतिरिक्त राजनीतिमा हुँदै उनी जग्गा कारोवारी समेत बनेका थिए।
खासगरेर राजमार्ग तर्फ जग्गा किनबेच गर्ने काम गर्थे। तर, जब सञ्चार उद्यमि अरुण सिंघानिया हत्याको अभियोगमा घटनाको जिम्मेवारी लिने अर्जुनसिंह भनिने मुकेश चौधरी पक्राउ परे तब देखि उनी फरार रहेको प्रहरीले बताएको छ।
विभिन्न अपराधहरुमा प्रमुख अभियुक्तको रुपमा चन्द्रदिपलाई प्रहरीले खोजी गर्न थालेपछि भूमिगत समूहको नाउँमा सरकारसँग बार्ता गरी विगतका अपराधहरुबाट उन्मुक्ति पाउन सकिने उद्देश्यले उनले भूमिगत संगठन खोलेको हुन सक्ने आशंका पनि गरिएको छ।
यद्यपि एउटा अपराध गरेपनि र धेरै अपराध गरेपनि केही फरक पर्न नसक्ने हुनाले उनको ती समुह झन खतरनाक हुन सक्ने किन पनि अनुमान गरिएको छ भने ती समुहको नाउँमा उनले धनुषा बालाबाखरका राजेन्द्र प्रसाद यादवको हत्या पनि गरिसकेका छन् भने नसिम राइनलाई ज्यान लिने प्रयासमा गोली प्रहार गरिसकेका छन्।
त्यसैगरी उनले विभिन्न व्यक्तिहरुलाई धम्की दिँदै चन्दा समेत व्यापक मात्रामा असुली गरिरहेको धनुषा प्रहरीमा उजुरी परेका छन्।
२०६६ साल फागुन १७ गते जनकपुरको शिव चौकमा संचार उद्यमि अरुण सिंघानियालाई र २०६७ साल असोज २४ गते धनुषा भरतपुर १ का ४० बर्षको विनोद गोइतमान यादवलाई बजारबाट मोटरसाइकलमा घर तर्फ भाग्ने क्रममा धारिलो हतियारले पेटमा र गोली समेत प्रहार गरी हत्या गरी फरार भई धनुषा प्रहरीको सर्बाधिक खोजीको सूचिमा फरार अभियूक्तको रुपमा चन्द्रदिप यादव रहेका थिए।
