जन्मेपछि मृत्यु स्वभाविक छ। कसैले टारेर पनि टर्दैन।
मृत्यु स्वभाविक हुँदाहुँदै पनि केही घटना र कसैको मृत्यु भने ह्दय विदारक हुने गर्छ।
कसैको मृत्युले परिवार, आफन्त, छरछिमेक तथा साथीभाईलाई मात्र पिडा दिन्छ भने कसैको मृत्युले सिंगो समाज, जिल्ला मात्र नभई सबैलाई शोकमा डुबाउने गर्दछ।
बुधबार अपरान्ह अर्घाखांचीमा भएको बस दुर्घटनाले पनि यस्तै अर्घाखांची जिल्लालाई मात्र नभई सिंगो मुलुकलाई नै शोकमा डुबाएको छ।
बुधबार दिउसो १२ बजे ६० भन्दा बढि यात्रु बोकेर सन्धिखर्कबाट बुटवलको लागि हिंडेको लु.१ ख ६२३१ नं. को बस छुटेको १५ मिनेटमै दुर्घटनामा परेको थियो।
सन्धिखर्कबाट १० किलोमिटरको दुरीमा पर्ने नरपानीमा आईपुग्दा बुटवलबाट सन्धिखर्कतर्फ ग्यास सिलिण्डर लिएर जांदै गरेको लु १ ख ७८२७ नम्बरको मिनि ट्रक संग ठोक्किदा उक्त दुर्घटना भएको जिल्ला प्रहरी कार्यालय अर्घाखांचीका प्रहरी प्रमुख प्रहरी नायव उपरीक्षक दिपेन्द्र जिसीले बताए।
दुर्घटनामा परी ३ भारतीय नागरिक सहित १९ जनाको मृत्यु भएको छ। मृतकमध्ये कतिपय एउटै परिवारका धेरै जना परेको प्रहरीले जनाएको छ। दुर्घटनामा परी अर्घाखांचीको वाङला घर भई अर्घाखांची अस्पतालमा कार्यरत ३८ वर्षिय डा. विष्णु आचार्य, आचार्यको बुवा ७५ वर्षिय जनार्दन आचार्य, ठाडा ३ का ३४ वर्षिय गणेश बेल्बासे, २४ वर्षिय अनिता बेल्बासे, बुटवलका ५० वर्षिय कृष्ण श्रेष्ठ, छमि श्रेष्ठ, चन्द्रलाल श्रेष्ठ छन्।
त्यसैगरी जुकेना ५ अर्घाखांचीका तिलकला बेल्बासे, नरपानीका २९ वर्षिय धनसरी बगाले, धारापानीका २६ वर्षिय नरेन्द्र बन्जाडे, ढाकावाङका २५ वर्षिय बसन्त क्षेत्री र प्यूठानका ३२ वर्षिय जनक खनाल छन्।
त्यस्तै भारत सुपौलीका ४५ वर्षिय आबतला लम्बु, ५१ वर्षिय एमासुती लम्बु र नुर आलम छन्। मृतक मध्ये ३ जनाको सनाखत हुन नसकेको प्रहरीले जनाएको छ।
मृतकमध्ये १३ जनाको घटनास्थलमा र अन्य ६ जनाको उपचारको क्रममा जिल्ला अस्पताल अर्घाखांचीमा मृत्यु भएको थियो। सोहि दुर्घटनामा ४४ जना घाइते भएका छन्।
घाइते मध्ये २४ जनालाई थप उपचारका लागि नेपाली सेनाको एमआई १७ हेलिकप्टरबाट काठमाण्डौ लगिएको अर्घाखांची स्थित चन्दननाथ गणका गणपती रामकाजी थापाले बताए।
घाइतेमध्ये १० जनाको लुम्बिनी अञ्चल अस्पताल बुटवल र १० जनाको जिल्ला अस्पताल अर्घाखांचीमा उपचार भइरहेको छ।
घाइतेमध्ये बस र ट्रक ठोक्किएपछि बसबाट हाम फालेका अधिकांश यात्रुहरुको ट्रकमा लोड गरिएका ग्यांसका सिलिण्डरले थिचिएर मृत्यु भएको थापाले जनाए।
घटनास्थलमा नेपाली सेना, नेपाल प्रहरी तथा स्थानीय दिनभर उद्धारमा लागेका थिए। १२ जना जिल्लावाशीको एउटै दुर्घटनामा मृत्यु भएको र ४५ जना घाइते भएपछि अहिले जिल्ला शोकमा छ।
बस दुर्घट्नामा परेका घाईतेहरुलाई थप उपचारका लागि राजधानी ल्याउने क्रममा त्रिभुवन विमानस्थलमा सुरक्षाकर्मीले एम्बुलेन्स तर्फ लग्दै।
बस दुर्घट्नाका घाइतेहरु थप उपचारका लागि टिचिङ अस्पताल लाने क्रममा एम्बुलेन्सको पर्खाईमा।
बस दुर्घट्नाका घाईते एक बालिका आफन्तका साथमा।
हामीसँग निरन्तर सम्पर्कका लागि तपाईं फेसबुक र ट्वीटर मार्फत् पनि जोडिन सक्नुहुन्छ।
