उपप्रधान तथा गृहमन्त्री वामदेव गौतम काठमाडौं प्रहरी प्रमुख रमेश खरेलमाथि खनिएका छन्। शनिबारदेखि काभ्रेको धुलिखेलमा सुरु भएको एमाले भातृ संगठन युवा संघको केन्द्रीय कमिटिको बैठकलाई सम्बोधन गर्दै रमेश खरेल आफू सेलीब्रेटी बन्न खोजेको आरोप लगाए।
एमाले उपाध्यक्ष समेत रहेका गौतमले भने, 'जो पायो त्यहीलाई पक्रिने अनि दुई/तीन दिनमा छाड्ने अपराधीलाई उन्मुक्ति दिने कुन तरिका हो। यसबाट उनी सेलीब्रेटी बन्न खोजेका छन्।'
खरेलविरुद्ध पुरै आक्रोशित गौतमले उनी आफूलाई भेट्नसमेत नआएको भन्दै उनले गुनासो गरे, 'स्वाभीमान गिर्ने भएर होला मेरो कार्यालय र अफिस कहीँपनि नआएको।'
आफू गृहमन्त्री हुँदा कसैलाई अन्याय हुन नदिने उनले बताए। साथै जनतामा शान्ति सुरक्षामा ढुक्क हुन आश्वस्थ पारे। बैठकमा युवा संघका अध्यक्ष महेश बस्नेतले आफ्ना केन्द्रीय सदस्य अमित लामालाई पक्राउ गरी प्रहरीले सिंघम शैलीमा पत्रकार सम्मेलन गरेको भन्दै पक्राउ गर्ने प्रहरीलाई कारबाही गर्न गृहमन्त्रीसँग माग गरेका थिए।
