'गरेरै छोड्ने हो, परिवर्तन हेरेरै मर्ने हो।' यसैलाई मूल नारा लिएर समाज सेवामा सक्रियता देखाएका पत्रकार रविन्द्र मिश्र नेपाली समाजको लागि नौलो नाम होइन।
परोपकारी भावना बोक्नु र गर्नुमा धेरै अन्तर छ। त्यसैले दिउँसो भरि गिट्टी बोकेर हिड्ने एक विद्यार्थीले आफ्नो कमाइबाट जोगाएर हेल्प नेपाल संस्थालाई दिएको १ हजार ५० रुपैयाँ र करौडौ कमाउनेको १ लाख सहयोगबीचमा भिन्नता तपाईँ-हामी आफैंले मुल्यांकन गर्न सक्छौं।
समाजमा परेका बाधा ब्यवधान र अफ्ठेरोलाई मल्हम लगाउन सदाचारी भावना बोकेर समाजको पुनर्निर्माणमा हिडेका रवीन्द्र मिश्रले खोलेको हेल्प नेपाल नामक संस्था पर्यायबाची बनेको छ।
कुनै पनि कामको सुरूवात शून्य अथवा सानोबाट गरेर निरन्तर लागिपरेमा पछि त्यसैले आफ्नो उचाई छुदै ठूलो भएर निस्कन्छ।
दृढ विश्वासका साथ अगाडि बढेको हेल्प नेपाल सामाजिक संस्था अहिले देश भित्र र बाहिर अनेकौं ठाउँमा आफ्नो काम गरिरहेको छ। कहि विद्यालयको भत्केको छानो टाल्नेदेखि लिएर नयाँ विद्यालय खोल्नसमेत सहकार्य र सहयोग गरिरहेको छ।
यसैबीचमा काभ्रेको धुलिखेलमा ५० अनाथ बालबालिकाको लागि भवन निमार्ण हुदैछ भने भविश्यमा पनि धेरै परोपकारी कामहरू गर्ने उद्देश्यका साथ अगाडि बढेको संस्थाका संस्थापक रविन्द्र मिश्रले बताए।
संस्था स्थापनाका लागि परोपकारी मन भएका नेपाली दाजुभाइ तथा सुभेच्छुकबाटै आवश्यक रकमको जोहो गर्ने गरेको संस्थाले बताएको छ।
यो संस्थाले कुनै कामको थालनी गरेपछि पूरा नभएसम्म भएका हरेक हरहिसाबमा पारदर्शी छ। अर्थात जुन ठाँउमा कामको थालनी भएको छ त्यो ठाँउका मान्छेहरुलाई छर्लङग हुने गरी सबै हिसाब देखाइन्छ।
यसै सन्दर्भलाई सघाउन गैर आवासिय नेपाल संघका पूर्वअध्यक्ष उपेन्द्र महतोले बुधवार हेल्प नेपालको कार्यालयमा गएर १० लाखको चेक हस्तान्तरण गरेका छन् ।
संस्थालाई स्थापनाकाल देखिनै सहयोग गर्दै आएका महतोले पहिलो पटक बेलायतमा रजिष्ट्रर गर्न देखि अहिलेसम्म पनि सहयोग गरिनै रहेका छन्।
हेल्प नेपालका लागि उनको यो तेस्रो ठूलो सहयोग हो। पहिलो पटक ६ लाख सहयोग गरेका महतोले दोस्रो पटकमा ८ लाख र बुधबार १० लाख नगद सहयोग गरेका हुन्।
'राम्रो काम गर्ने मान्छेलाई साथ दियो भने नराम्रो गर्ने मान्छेले पनि राम्रो गर्नेबाट केही सिक्छ र परोपकार गर्ने संस्कार बनाउँछ,'कार्यक्रममा बोल्दै महतोले भने।
यसैबीच कार्यक्रममा पत्रकार तथा संस्थापक मिश्रले महतोको सहयोगका लागि धन्यवाद दिँदै परोपकारी मन भएका सबै नेपालीलाई सहयोग गर्न अपिल गरेका छन् ।