निजी मेडिकल कजेलको सम्बन्धनको विवाद सेलाउन नपाउँदै सरकारले प्राविधिक शिक्षा तथा व्यसायिक तालिम परिषद (सिटीइभिटी) मार्फत नर्सिङ कलेजलाई गुपचुपमै सम्बन्धन दिने निर्णय गरेको छ।
सरोकारवालाहरुको ध्यान अन्यत्रै केन्द्रीत भइरहेको बेला शिक्षा मन्त्री चित्रलेखा यादवको अध्यक्षतामा बसेको परिषदको बैठकले अधिकांश भौतिक पूर्वाधार पूरा नभएका कलेजहरुलाई समेत सम्बन्धन दिने निर्णय गरेको परिषदका एक सदस्यले सेतोपाटीलाई बताए।
परिषदका अधिकांश सदस्यहरु बैठकमा अनुपस्थित रहेपनि सोमबार बसेको परिषदको बैठकले १४ वटा नर्सिङ कलेज र ५ ल्याव एसिस्टेण्ट र डेण्टल केयर सम्बन्धी अध्ययन संस्थालाई सम्बन्धन दिने निर्णय गरेको हो। तर, विद्यार्थीहरुको शूल्क घटाउने विषयमा भने बैठकमा कुनै सहमति हुन सकेन।
परिषद बैठक र त्यसको निर्णयबारे सेतोपाटीले साँझ सम्पर्क गर्दा शिक्षा मन्त्री एव्ं परिषद अध्यक्ष यादवले यस विषयमा सदस्य सचिवसँग सम्पर्क गर्न भन्दै फोन राखेकी थिइन्। शिक्षा मन्त्री एवम् परिषद अध्यक्ष यादव मंगलबार आठ दिनका लागि अमेरिका भ्रमणमा जादै छिन्।
अपरान्ह ४ बजेदेखि शुरु भएको बैठकको विषयमा जानकारी लिन परिषदका सदस्य सचिव रामहरि लामिछानेसँग पटक पटक कोशिश गर्दा सम्पर्क हुन सकेन भने परिषदका अन्य सदस्यहरुले यस विषयमा आफूहरु औपचारिक रुपमा केही बताउन नसक्ने भन्दै बोल्न मानेनन्।
नाम उल्लेख नगर्ने शर्तमा बैठकमा सहभागी एक सदस्यले दिएको जानकारी अनुसार, आइतबार प्राप्त बैठकको कार्यसूचिमा देशका विभिन्न भागमा रहेका नर्सिङ कलेजको सम्बन्धन, विद्यार्थीको शुल्क घटाउने तथा परिषदमा कार्यरत ६० वर्ष उमेर पुगेका कर्मचारीको सेवा निबृत्ति पश्चात पाउने सुविधाको व्यवस्थाबारे जानकारी दिइएको थियो।
२०६१ देखि २०६४ सालमा सम्बन्धनका लागि आवेदन दिएका कतिपय कलेजहरुको विषयमा अख्तियार दुरुपयोग अनुसन्धान आयोगले समेत प्रक्रिया अघि बढाउन निर्देशन दिएपछि परिषदले प्रक्रिया अघि बढाएको त्यी सदस्यले बताए।
यसरी सम्बन्धनको माग गरी सिटिइभिटीमा आवेदन दिने संस्थामा अधिकांश मध्य र सुदूर पश्चिमाञ्चल विकास क्षेत्रबाट रहेका छन्।
स्रोतका अनुसार, यसरी सम्बन्धनका लागि आवेदन दिनेहरु संस्थाहरुमा काठमाडौंस्थित महेन्द्रनारायण निधि मेमोरियल अस्पताल बत्तिसपुतली बाहेक उपत्यका बाहिरका विरलै संस्थाको मात्र भौतिक संरचना तोकिएको मापदण्ड अनुसार रहेको छ।
सम्बन्धनमा परेका कतिपय कलेज स्थापनाका लागि जग्गा खरिद बाहेक अरु भौतिक पूर्वाधार समेत नभएको सम्बन्धित जिल्लाका सभासदहरु नै बताउँछन्।
शिक्षा मन्त्रीको अध्यक्षतामा रहेको परिषदको बोर्डमा अहिले उपाध्यक्षको पद खाली रहेको छ। शिक्षा सचिव विश्वप्रकाश पण्डित परिषदको सदस्य भएपनि आजको बैठकमा आफू विशेष कामले गर्दा बैठकमा बस्न नसकेको भन्दै बैठकको बीचमा नै बाहिरिएका थिए। राष्ट्रिय योजना आयोगका सदस्य डा. यज्ञबहादुर कार्की आयोगको तर्फबाट परिषदको सदस्य भए पनि आफू आज साँझ मात्रै राजधानी आएकोले बैठकमा अनुपस्थित रहेको बताए।
सम्बन्धनका लागि आवेदन दिएका नर्सिङ कलेजको प्राप्त नामावलीः
महेन्द्रनारायण मेमोरियल अस्पताल काठमाडौं
ताल्छिखेल नर्सिङ क्याम्पस, ललितपुर
मैयादेवि नर्सिङ कलेज चितवन
नेशनल ह्यूमन रिसोर्स डिभलपमेण्ट एकेडमी जनकपुर
सुजंग अस्पताल डोटी
पद्म अस्पताल कैलाली
सुदूर पश्चिमाञ्चल मेडिकल कलेज कैलाली
कान्तिपुर एकेडमी तीनकुने काठमाडौ
शुभकामना टेक्नीकल कलेज रुपन्देही
भेरी कलेज वर्दिया
सामूदायिक जनस्वास्थ्य सेवा धनगढी
नेपाल सञ्जिवनी इन्स्टीट्यूट दाङ
