शिक्षण अस्पताल डाक्टर गोविन्द केसीको पछिल्लो अनशनपछि भएको सम्झौताका कारण नेपाल मेडिकल काउन्सिलका अध्यक्ष डा.जागेश्वर गौतमले आज पदबाट राजनीमा दिएका छन्। अनशनमा बसेका केसीले निजी मेडिकल कलेजमा लगानी, विवादास्पद छवि, स्वार्थ बाझ्ने अनेकौं पद ग्रहण र नयाँ मेडिकल कलेजलाई सम्बन्धन दिन भूमिका खेलेको भन्दै मेडिकल काउन्सिलका अध्यक्ष गौतमलाई समेत बर्खास्त गर्नुपर्ने माग राखेका थिए।
पहिलो, गौतमले स्वार्थ बाझिने गरी कम्तीमा तीनवटा सार्वजनिक पद एकैसाथ ओगटेका थिए। उनी, प्रसूति गृहका निर्देशक, स्वाथ्यमन्त्री खगराज अधिकारीका सल्लाहकार र नेपाल मेडिकल काउन्सिलका अध्यक्ष एकै साथ भएका थिए। काउन्सिल नियमनकारी संस्था हो, जसले उनी आफैँ निर्देशक रहेको प्रसूति गृहलाई समेत निरीक्षण र आवश्यक परे यसका पदाधिकारीलाई कारबाहीसमेत गर्नुपर्छ।
दोश्रो, उनी सरकारी चिकित्सक हुन्। तर, चिकित्सक पदमा रहँदा नै निजी क्षेत्रको लगानी रहेको चितवन मेडिकल कलेज सुरु गर्ने डाक्टरमध्येका उनी एक हुन्। केसीनिकट चिकित्सकका अनुसार उनलाई राष्ट्रिय सतर्कता केन्द्रले पनि कर्तव्य विमुख भएको भनी ग्रेड घटाउने गरी कारबाही गर्न स्वास्थ्य मन्त्रालयमा गरेको थियो।
तेश्रो, दामोदरप्रसाद गजुरेल काउन्सिलका अध्यक्ष हुँदा मेडिकल शिक्षामा दिइएको अत्यधिक सिट संख्या विवादित भयो। सरकारले गौतमको अध्यक्षतामा एक छानबिन समिति बनायो। समितिको प्रतिवेदनका आधारमा गजुरेलले राजीनामा दिए।
यसपछि, छानबिन समितिका अध्यक्ष रहेका गौतम अन्य वरिष्ठ चिकित्सकहरूलाई पछि पार्दै आफैँ काउन्सिलका अध्यक्ष बने। तर, उनले गजुरेल काउन्सिलका अध्यक्ष हुँदा निर्धारण गरिएको सिट संख्यामा कुनै फेरबदल गरेनन्।
केसी पक्षधरले प्रस्तावित मनमोहन मेडिकल कलेज र अन्य अस्पतालमा पनि गौतमको लगानी रहेको बताएका छन्। तर, सेतोपाटीसँगको कुराकानीमा उनले यसलाई इन्कार गरे। ‘मेरो कुनै पनि मेडिकल कलेज वा अस्पतालमा लगानी छैन,’ गौतमले भने, ‘मैले घरायसी कारणले काउन्सिलको पदबाट राजीनामा दिएको हुँ।’
डा. केसीका १० सूत्रीय मागमा मेडिकल कलेजको सम्बन्धनमा संलग्न विश्वविद्यालय, नेपाल मेडिकल काउन्सिललगायत पदाधिकारीहरूमाथि कारबाही पनि एक थियो। सम्झौता गर्ने बेलामा मुख्य सचिव लीलामणि पौडेलले उनीहरूमाथि कारबाही हुने र त्यसको परिणाम एक दुई दिनमै आउने आश्वासनसमेत दिएका थिए। उच्च सरकारी स्रोतअनुसार, उनको राजीनामाको जानकारी मुख्य सचिव लीलामणि पौडेललाई स्वास्थ्य सचिवले जानकारी गराइसकेका छन्। पौडेलले समेत यो जानकारी डा. केसीलाई गराइसकेका छन्।
