काठमाडौंका प्रहरी प्रमुख एसएसपी रमेश खरेललाई काठमाडौं प्रहरीबाट हटाउने तयारी गरिरहेको बेला एकीकृत माओवादीका नेता एवं पूर्व प्रधानमन्त्री बाबुराम भट्टराईले खरेललाई कारबाही गर्न नहुने बताएका छन् ।
खरेलको बचाउ गर्दै भट्टराईले आफ्नो ट्विटर स्टाटसमा प्रहरीको एआईजी बढुवामा आर्थिक चलखेल भएको भरपर्दो स्रोतबाट थाह भएको छ भन्दै यसबारे भेद खोल्ने इमान्दार अफिसरलाई उल्टै कारवाही गरिनु ठीक होइन भनेका छन्।
व्यसायिक दक्षता भएका प्रहरी अधिकारी खरेलले गत साता राजधानीको एक सार्वजनिक कार्यक्रममा डिआईजिपीहरु बढुवाका लागि बि्रफकेस बोकेर शक्तिकेन्द्र धाउने गरेको अभिव्यक्ति दिएका थिए ।
त्यसपछि गृहमन्त्रालयले खरेल संगठनको नीति विपरीत गएको भन्दै काठमाडौं प्रहरीबाट हटाउन भनेको थियो। खरेलको अभिव्यक्तिमाथि प्रहरी मुख्यालयले डिआईजिपीको संयोजनमा छानबीन समितिसमेत गठन गरेको छ । यसैबीच खरेललाई काठमाडौं प्रहरीबाट हटाउने गृहको तयारीलाई निर्वाचन आयोगले आचारसंहिता लागू भइसकेको भन्दै हाललाई रोकेको छ।
