यौन शोषण, बलात्कार र आनीहरूलाई बेपत्ता बनाएको आरोप लागेका रामबहादुर बमजन सिन्धुलीस्थित आश्रममै रहेको प्रहरीले बताएको छ। उनीमाथि लागेका सबै आरोपबारे अनुसन्धान गरिरहेको नेपाल प्रहरीको केन्द्रीय अनुसन्धान ब्युरोले बमजन सिन्धुलीमै रहेको बताएको हो।
‘बम्जन भागेको भन्ने हल्ला चलेको छ, त्यो होइन,’ ब्युरोका एक अनुसन्धान अधिकारीले सेतोपाटीसँग भने, ‘उनी आश्रमभित्रै छन्।’
बमजन प्रहरीको सम्पर्कबाट बाहिर नरहेको ती अधिकारीले बताए।
‘प्रहरीले चाहेको बेला सम्पर्कमा आइरहेका छन्, आश्रमले उनलाई प्रहरीको सम्पर्कमा ल्याइरहेको छ,’ ती अधिकारीले भने।
ब्युरोले बमजनका गतिविधि अनुसन्धान गरिरहेको छ। बमजनको आश्रमबाट बेपत्ता पारिएका आनीहरूको खोजी गरिरहेको छ।
‘हामीले अहिलेसम्म कसैलाई फेला पारेका छैनौं, कोही फेला परेपछि मात्र बम्जनमाथि थप अनुसन्धान प्रक्रिया सुरू हुने हो,’ ब्युरो स्रोतले भन्यो।
बमजनलाई जिल्ला प्रहरी कार्यालय सिन्धुपाल्चोकले बढी निगरानी गरिरहेको छ।
सिन्धुपाल्चोक प्रहरीले बमजनमार्फत बेपत्ता पारिएकाको खोजी भइरहेको जनाएको छ। बेपत्ता पारिएका व्यक्तिको अनुसन्धान निकै जटिल रहेकाले यसमा लामो समय लाग्ने सिन्धुपाल्चोकका प्रहरी उपरीक्षक मुकुन्द मरासिनीले बताए। ‘अनुसन्धान प्रक्रिया अलि लामो छ, विभिन्न तरिकाले अनुसन्धान गरिरहेका छौं,’ उनले भने।
तर, बमजन कतै भागेको हल्ला सत्य नरहेको उनले बताए।
‘बमजन सिन्धुलीको आश्रममै छन्, प्रहरीले खोज्दा उपलब्ध भइरहेका छन्,’ एसपी मरासिनीले सेतोपाटीसँग भने।
केही दिन संसदमा बोल्दै गृहमन्त्री रामबहादुर थापाले बमजनमाथिको अनुसन्धानलाई गम्भीर रूपमा लिएर सरकारले काम गरिरहेको बताएका थिए।
यी पनि पढ्नुहोस्-
पहिलो स्टोरी— बमजनको आश्रममा तीन आनी बेपत्ता, एक अनुयायीको हत्या
दोस्रो स्टोरी— बमजनको आश्रमबाट भागेका तीन आनीको कथा
तेस्रो स्टोरी: गंगामायाको कथा— आफू बमजनबाट बलात्कृत भइन्, साना आनीहरूलाई भने जोगाइन्
चौथो स्टोरी— बमजन कसरी बने मैत्रेय बुद्ध?
पाचौं स्टोरी -बमजनको आश्रमबाट पाँचौं व्यक्ति पनि बेपत्ता
