तपस्वीको भेषमा बसिरहेका रामबहादुर बमजनको आश्रमबाट आफ्ना परिवारका सदस्य बेपत्ता भएको भन्दै विभिन्न जिल्लामा ४ वटा जाहेरी परेका छन्।
नुवाकोट, मकवानपुर र बारा जिल्ला प्रहरी कार्यालयमा छुट्टाछुट्टै चार जाहेरी परेका हुन्।
बमजनको आश्रम गएका आफ्ना बुबा खोजिदिन भन्दै मकवानपुरका महेन्द्र वाइवा, छोरा खोजिदिन भन्दै बाराका हस्तबहादुर आलेमगर, दिदी खोजिदिन भन्दै मकवानपुरका विजय रूम्बा र बहिनी खोजिदिन भन्दै नुवाकोटकी गंगामाया तामाङले आ-आफ्ना जिल्लाका प्रहरी कार्यालयमा निवेदन दिएका छन्।
मकवानपुरको हेटौंडा उपमहानगरपालिका-१४ स्थित वनस्पति चोक बस्ने महेन्द्रले आफ्ना बुबा सञ्चलाल वाइवा बमजनको आश्रमबाट ४ वर्षदेखि बेपत्ता भएको भन्दै प्रहरीमा जाहेरी दिएका हुन्।
उनका अनुसार बुबा सञ्चलालले २०७१, चैत १४ गते सिन्धुपाल्चोकको बडेगाउँस्थित बमजनको आश्रमबाट फोन गरेर १७ गते घर आउने बताएका थिए। बुबा १० दिनसम्म नआएपछि महेन्द्रले त्यही बेला प्रहरीमा उजुरी दिए। उजुरी गरेको पर्सिपल्ट आफैं बुबालाई खोज्दै बमजनको सिन्धुपाल्चोक आश्रम पुगेका थिए। त्यहाँ पुगेपछि बुबा आश्रमबाट निस्किसकेको जवाफ पाए। त्यसयता उनले निकै सोधिखोजी गरेका छन्।
जति सोधिखोजी गरे पनि बुबाको अत्तोपत्तो नलागेको उनले जाहेरीमा उल्लेख गरेका छन्।
सेतोपाटीले भने उनका बुबा सञ्चलालको हत्या भएको फेला पारेको छ। त्यति बेला आश्रममै बस्ने चेलाहरूका अनुसार बमजनले कुट्दाकुट्दै सञ्चलालको ज्यान गएको थियो।
प्रहरीमा बमजनको आश्रमबाट परिवारका सदस्य हराएको भन्दै जाहेरी दिने अर्का व्यक्ति हुन् हेटौंडा, रंगशालाका विजय रूम्बा।
उनकी दिदी फूलमाया रूम्बालाई बमजनको आश्रममा डोल्मो नाम दिइएको थियो। डोल्मो २०६८ देखि बमजनको आश्रममा बस्दै आएकी थिइन्।
विजयका अनुसार उनले पछिल्लोपटक २०७१, माघमा सिन्धुपाल्चोकको बडेगाउँस्थित आश्रमबाट घरमा सम्पर्क गरेकी थिइन्। त्यो बेला उनले आफूलाई छिट्टै भेट्न आउन आमाबुबालाई भनेकी थिइन्। उनीहरू जान पाएनन्। असारमा छोरी भेट्न गएका आमाबाबुले उनी आश्रमबाट फागुनमै निस्किएको जवाफ पाए। त्यसपछि विजयको परिवारले डोल्मोलाई खोजेको खोज्यै छ।
डोल्मोसँगै उनकी साथी नुवाकोटकी कर्मा तामाङ बेपत्ता छन्। बमजनको आश्रममा उनको नाम चुन्मो थियो। चुन्मोकी दिदी गंगामायाले बिहीबार नुवाकोट प्रहरीमा आश्रमबाट बेपत्ता भएकी आफ्नी बहिनी खोजिदिन भन्दै जाहेरी दिएकी छन्।
'म निवेदिकाकी बहिनी, २०६८ मा सिन्धुलीस्थित बमजन आश्रममा पढ्न भनी गएकी थिइन्। २०६९ मा एकपटक साथीसँगै घरमा आएर एक दिन बसेकी थिइन्। उनीहरू बमजनकै आश्रम फर्केका थिए। त्यसपछि उनीहरू अहिलेसम्म सम्पर्कमा छैनन्,' गंगामायाको जाहेरीमा उल्लेख छ, 'आवश्यक खोज तलास गरिदिनु हुन यो निवेदन पेश गरेकी छु।'
बहिनी सम्पर्कमा नआएपछि गंगामाया र परिवारले बमजनसँग भेट गर्न खोजेका थिए। उनले भेटै दिएनन्। बमजन निकट व्यक्तिहरूले चुन्मो 'आश्रमबाट निस्किएर कहाँ गएको हो, आफूहरूलाई थाहा छैन' भन्ने जवाफ दिए।
आफ्ना बुबा, दिदी र बहिनीमाथि बमजन आश्रममा भएको हिंसा र हत्याबारे महेन्द्र, विजय र गंगामाया अनभिज्ञ थिए।
तीन आनी बेपत्ता र एक अनुयायीको हत्या लगायत बमजन आश्रममा हुने यौन शोषण, हत्या-हिंसाबारे सेतोपाटीमा प्रकाशित स्टोरी पढेपछि हस्तबहादुर आले मगरले पनि आफ्ना छोरा बेपत्ता भएको खबर गरेका थिए। तीन वर्षदेखि आफ्ना छोरा बमजन आश्रमबाट बेपत्ता भएको भन्दै हस्तबहादुरले पनि बिहीबार नै प्रहरीमा जाहेरी दिएका छन्।
उनका छोरा सुरेश आलेमगर लामो समयदेखि बमजनसँगै बस्दै आएका थिए। बेलाबेला घर आउँथे। पछिल्लोपटक उनी २०७२ को भुइँचालोपछि आएका थिए। फेरि बमजन आश्रममा जाने /नजाने दोधारमै थिए।
त्यही बेला बमजनका विश्वासपात्र जशबहादुर वाइवाले छोरालाई मोटरसाइकलमा राखी लिएर गएको भन्दै बुबा हस्तबहादुरले जाहेरी दिएका हुन्।
'छोरा बमजनको आश्रममा फेरि जाउँ कि नजाउँ भन्ने दोधारमा थियो। त्यही बेला जीतपुर, बमजनका विश्वासपात्र, सिमरा उपमहानगरपालिका˗१६ पिलुवा घर भएका जशबहादुर वाइवाले छोरालाई फकाई घरबाट लिएर गएका थिए,' उनले बिहीबार प्रहरीमा दिएको जाहेरीमा भनिएको छ, 'रामबहादुर बमजनकै आश्रय स्थलबाट हराएको हुँदा उसको वास्तविकता पत्ता लगाई सकुशल उद्धार गरिदिन अनुरोध गर्दछौं।'
यो श्रृंखलाका स्टोरीहरू पढ्नुहोस्-
पहिलो स्टोरी— बमजनको आश्रममा तीन आनी बेपत्ता, एक अनुयायीको हत्या
दोस्रो स्टोरी— बमजनको आश्रमबाट भागेका तीन आनीको कथा
तेस्रो स्टोरी: गंगामायाको कथा— आफू बमजनबाट बलात्कृत भइन्, साना आनीहरूलाई भने जोगाइन्
चौथो स्टोरी— बमजन कसरी बने मैत्रेय बुद्ध?
पाचौं स्टोरी -बमजनको आश्रमबाट पाँचौं व्यक्ति पनि बेपत्ता
