विश्वकपको पूर्वसन्ध्यामा ब्राजिलले अष्ट्रियासँगको मैत्रीपूर्ण खेल ३-०ले जितेको छ। ब्राजिलको जितमा नेइमार, फिलिप कौटिन्हो र गाब्रिएल जिससले गोल गरे।
अस्ट्रियामा आइतबार साँझ भएको मैत्रीपूर्ण खेलको ३६ औं मिनेटमा जिससको गोलबाट ब्राजिलले अग्रता लिएको थियो। पहिलो हाफ १-०ले अगाडि रहेको विश्वकपको उपाधि दाबेदार ब्राजिल दोस्रो हाफमा थप आक्रमक बन्यो।
दोस्रो हाफको ६३औं मिनेटमा नेइमारले गोल गर्दै अग्रता दोब्बर पारे। तीन महिना मैदान बाहिर रहेका नेइमारले आफू विश्वकपका लागि अब पूर्ण फिट भएको जनाउँसमेत दिए।
यस्तै खेलको ६९ औं मिनेटमा ब्राजिलका लागि फिलिप कौटिन्होले गोल गर्दै अग्रता तेब्बर बनाए।
अधिकांश समय बल नियन्त्रणमा लिएको ब्राजिलले १० पटकभन्दा बढी पोल एटम गरेको थियो।
यसअघिको अभ्यास खेलमा ब्राजिलले क्रोएसियालाई २-० ले हराएको थियो।
आगामी बिहिबारदेखि सुरू हुने फिफा विश्वकपको समूह ईमा रहेको ब्राजिलले पहिलो खेल जुन १७ मा स्विटजरल्यान्डसँग खेल्नेछ।
