पूर्वगृहमन्त्री माधवप्रसाद घिमिरे सवार गाडी दुर्घटना परेपछि छानबिन गर्न गठित समितिले उनी सवार गाडी मोडमा ओभरटेक गर्ने क्रममा दुर्घटना भएको निष्कर्ष निकालेको छ। गृहमन्त्री विमलेन्द्र निधिलाई बुझाइएको प्रतिवेदनमा समितिले घिमिरे सवार गाडी आपराधिक प्रवृत्तिबाट दुर्घटना हुन नगएको दाबी गरेकाे छ।
घिमिरेले गाडी आफैँ हाँकेको र मोडमा ट्रकलाई ओभरटेक गर्ने क्रममा दुर्घटना भएको देखिएको छानबिन समितिका संयोजक कुबेरसिंह रानाले बताए। 'दुर्घटनामा कसैको आपराधिक संलग्नता देखिएन,' उनले भने, 'प्रत्यक्षदर्शी र घाइते चालकको वयान अनुसार यो दुर्घटना नै हुन गएको समितिको निष्कर्ष छ।'
छानबिन समितिले घिमिरे सवार जिपभन्दा पछाडि आइरहेको बस चालक विष्णु परियार, क्याबिनमा बसेका यात्रु सुमन केसी र घिमिरेका गाडीका चालक तथा नेपाल प्रहरीका अंगरक्षक विष्णुबहादुर राईसँग घटनाबारे जानकारी लिएको थियो। घिमिरे सवार बा ९ च १५३१ नम्बरको निजी गाडी मुग्लिन र कुरिनटार बीचको घोप्टेभीरबाट त्रिशुली नदीमा खसेको थियो।
त्रिशूलीमा बिलाएका कुशल र निष्कलंकित प्रशासक
प्रत्यक्षदर्शीले घिमिरे सवार गाडीले ट्रक ओभरटेक गर्न खोज्दा विपरिततर्फबाट अर्को ट्रक आएको र छल्न खोज्दा दुर्घटना भएको बताएको रानाले बताए। उनीहरूले त्यसपछि घिमिरे चढेको गाडी भीरमा हुत्तिएको देखेको बताएका थिए। गाडी सडकबाट खसेपछि दुई स्थानमा ठक्कर खाएर नदीमा झरेको छानबिन समितिको प्रतिवेदनमा उल्लेख छ।
साथै प्रहरीले राजमार्गमा रहेका सिसिटिभी फुटेज लिएर पनि अनुसन्धान गरेको थियो। मुक्तिनाथ मन्दिर दर्शन गरेर फर्कने क्रममा उनी सवार गाडी गत असोज ९ गते चितवनको दारेचोक नजिक दुर्घटनामा परेको थियो। त्यसपछि सरकारले छानबिन गर्न पूर्व प्रहरी महानिरीक्षक रानाको संयोजकत्वमा समिति गठन गरेको थियो। घिमिरेको अहिलेसम्म शव भेटिएको छैन। दुर्घटनामा उनको आमा र भाइको समेत निधन भएको थियो।
