डाक्टरमाथि कुटपिट गर्ने नेपाली प्रहरीका असईलाई कारबाहीको माग गर्दै ललितपुरको पाटन अस्पतालका चिकित्सकहरु आन्दोलनमा उत्रिएका छन्।
उनीहरुले इमर्जेन्सीबाहेक सबै सेवा ठप्प पारेका छन् । जसका कारण विरामीहरु मर्कामा परेका छन् ।
अस्पतालका चिकित्सकहरु डाक्टर विमल पाण्डे र संचित कार्कीमाथि कुटपीट भएको भन्दै सेवा ठप्प पारिएको प्रशासन शाखाका प्रकाश खड्काले सेतोपाटीलाई जानकारी दिए । डाक्टर पाण्डे र कार्कीमाथि हिजो बिहीबार नेपाल प्रहरीका असई विजय सिलवालसहितका ३ जनाले कुटपीट गरेका थिए।
सिलबालसहित उनका साथमा रहेका बहिनी ज्वाँइ पनि अहिले ललितपुर प्रहरी नियन्त्रणमा छन्। डाक्टरमाथि कुटपीट गर्नेलाई नियन्त्रणमा लिएको र कारबाही हुने ललितपुरका एसएसपी पिताम्बर अधिकारीले सेतोपाटीलाई जानकारी लिए।
'डाक्टरमाथि हातपात गर्ने असईलाई कारबाही हुन्छ,' उनले भने 'तर यही विषयलाई उचालेर अस्पतालको सेवा ठप्प पार्नु गलत हो।'
उनले दोषीलाई कारवाही हुने भन्दै अस्पतालका काम सूचारु गर्न समेत आग्रह गरेका छन्। समस्या समाधानका लागि हिजो पनि अस्पताल प्रशासन र प्रहरीबीच छलफल भएको थियो । छलफलमा अस्पतालले डाक्टरमाथि कुटपीट गर्ने असईलाई कडा कारबाहीका माग राखेका थिए।