ललितपुरको लगनखेलस्थित पाटन अस्पतालमा नेपाल प्रहरीका असईले २ जना डाक्टर कुटेका छन्। गोदावरी घर भइ वालुवाटार सामुदायिक प्रहरीमा कार्यरत नेपाल प्रहरीका असई विजय सिलवालले अस्पतालका डाक्टरद्वय विमल पाण्डे र संचित कार्कीमाथि कुटपिट गरेका हुन्।
उनको आफन्त अस्पतालमा जण्डिस भएर उपचारार्थ रहेको र उनले रिफर गर्न आग्रह गरेपछि अस्पतालले डिस्चार्ज गरेको थियो। चिकित्सकहरुले विरामी लैजान एम्बुलेन्स खोज्नुभन्दा उनले डाक्टरमाथी नै आक्रमण गरेको अस्पतालले जनाएको छ।
एम्बुलेन्स खोज्ने काम अस्पतालको हो विरामीको आफन्त होइन भन्दै उनले कुटपीट गरेको एक नर्सले सेतोपाटीलाई जानकारी दिईन। प्रहरीको बर्दीमा नै रहेका उनले बर्दी खोलेर डाक्टरहरुमाथि कुटपीट गर्न थालेको उनले बताईन। डाक्टर कुट्ने प्रहरीको बर्दीमा एउटा तारा फुली थियो,' ती नर्सले भनिन्।
अन्य विरामीका आफन्तहरुको सहयोगमा ललितपुर प्रहरीले उनलाई पक्राउ गरेको छ। उनको साथमा रहेका उनकै बैनी ज्वाइ पनि ललितपुरको प्रहरी नियन्त्रणमा छन्। घटनापछि चिकित्सकहरुले काम छाडेर आन्दोलनमा उत्रिएका छन्। उनीहरुले दोषीलाई कारबाही गर्न माग गरेका छन्। चिकित्सकहरु काम छाडेर आन्दोलनमा लागेपछि अन्य विरामी मर्कामा परेका छन्।