दार्जिलिङको छिमेकी राज्य सिक्किमका प्रभावशाली मुख्यमन्त्री पवन चाम्लिङले गोर्खाल्यान्ड राज्यको स्थापनामा सिक्किमको पूर्ण समर्थन रहेको जनाएका छन् ।
छुट्टै राज्य मागको नेतृत्व गरिरहेको गोर्खा जनमुक्ति मोर्चा सम्बद्ध युवा संगठनका करिब तीन सया युवासँगको भेटमा मुख्यमन्त्री चाम्लिङले गोर्खाल्यान्ड स्थापनाप्रति सिक्किमको ऐक्यवद्धता जनाए ।
सिक्किम र चाम्लिङ सरकारको सहयोग र समर्थन लिन युवाहरूको समूह कालिम्पोङबाट हिँडेरै अइतबाार साँझ सिक्किम पुगेका थिए । युवाहरूलाई सम्बोधन गर्दै चाम्लिङले आफू सदैव स्वतन्त्र गोर्खाल्यान्ड राज्यको पक्षमा रहेको उल्लेख गर्दै केन्द्रीय तहमा पनि उक्त मुद्दा उठाउने वचन दिए ।
उनले सिक्किम विधानसभाले गोर्खाल्यान्ड राज्यको पक्षमा प्रस्ताव पारित गरेको पनि स्मरण गराए ।
सिक्किम राज्यलाई सिलिगुडीसँग जोड्ने एक मात्र राष्ट्रिय राजमार्ग ३१ ‘ए’लाई बन्दक्षेत्र बाहिर राखिदिन पनि चाम्लिङले अनुरोध गरे ।
जिटिए विघटन गर्न छलफल
पश्चिम बंगाल सरकारले गोर्खा टेरिटोरियल एड्मिनिस्ट्रेसन (जिटीए)मा विमल गुरूङको सट्टा अर्को कार्यकारी नियुक्ति गर्ने तयारी गरेपछि आफ्नो रणनीति तय गर्न गोर्खा जनमुक्ति मोर्चाले आकस्मिक बैठक डाकेको छ ।
गोर्खाल्यान्डको माग गर्दै दार्जिलिङमा अनिश्चितकालीन आम हड्ताल आह्वान गरेपछि मोर्चाका अध्यक्ष विमल गुरूङले जिटिएको प्रमुख कार्यकारीबाट साउन १५ मा राजीनामा दिएका थिए । राज्य सरकारले गुरूङको ठाउँमा जिटिएका दोस्रो वरियताका रमेश आलेले मंगलबारसम्म नेतृत्व नसम्हाले आफ्नै पहलमा प्रमुख कार्यकारी तोक्ने बताएको छ ।
पश्चिम बंगालको सत्तारूढ पार्टी त्रिणमूल कांग्रेसका दार्जिलिङस्थित कानुनी सल्लाहाकार तथा लोकप्रिय गायक दुर्गा खरेललाई राज्य सरकारले जिटिए प्रमुख कार्यकारी बनाउन लागेको अड्कलबाजी गरिएको छ । खरेललाई प्रमुख कार्यकारीको पद नसम्हाल्न चेतावनी तथा आक्रमणका धम्की आएपछि उनले त्रासका कारण घर छाडेको स्थानीय सञ्चार माध्यमले जनाएका छन् । उनले आफ्ना दाजु बद्री खरेलसँग मिलेर गाएको ‘बोलाउँ भने तिमीलाई बात लाग्ने डर’ गीत निकै लोकप्रिय छ ।
खरेलले आफू प्रमुख कार्यकारी पदको आकांक्षी भए–नभएको खुलाएका छैनन् । खरेल हाल त्रिणमूल कांग्रेसका तर्फबाट जिटिएका सदस्य छन् ।
आज डाकिएको मोर्चाको आकस्मिक बैठकले जिटिएबारे आफ्नो धारण तय गर्नेछ । मोर्चाभित्र पनि जिटिएबारे के गर्ने भन्नेमा अलग–अलग धारणा देखिएका छन् । केहीले जिटिए विगठनको घोषणा गर्ने वा जिटिएमा मोर्चाका सबै सदस्यले राजीनामा दिने कडा विकल्प सुझाएका छन् भने मोर्चाका अन्य नेताले आलेलाई मुख्य प्रशासकको पद सम्हाल्न लगाउनु व्यवहारिक बाटो हुने तर्क गरेका छन् ।
केन्द्रमा लबिङ गर्न मोर्चा महासचिव रोशन गिरीको नेतृत्वमा दिल्ली गएको ६ सदस्यीय टोलीलाई पनि बैठकका लागि डाकिएको छ । दिल्लीमा प्रधानमन्त्री मनमोहन सिंह, सत्तारूढ यूपिए गठबन्धनकी अध्यक्ष सोनीया गान्धी तथा गृहमन्त्री सुशीलकुमार सिन्धेलाई भेट्न समय माग गरिएको भए पनि गिरीको टोलीले उनीहरूसँग भेट पाउन सकेन । टोलीले भाजपाका अध्यक्ष राजनाथ सिंह तथा लोकसभामा विपक्षी दलकी नेतृ सुषमा स्वराजसँग भने भेट गरेको थियो ।
भाजपा नेतृत्वले छुट्टै गोर्खाल्यान्ड राज्यप्रति समर्थन जनाएको दाबी टोलीले गरेको छ ।
छुट्यो कि,
