अर्थ मन्त्री शंकरप्रसाद कोइरालाले आफू उपाध्यक्ष भएको भक्तपुरस्थित कमलनयनाचार्य (मुक्तिनाथ बाबा) आश्रमका लागि विभिन्न निकायबाट करोडौं रकम दिएको खुलासा भएको छ।
उनले अर्थमन्त्री भएपछि अखण्डज्योतिबाबा स्वामीश्रीजी च्यारिटेवल ट्रष्टका लागि जलउत्पन्न प्रकोप नियन्त्रण, सडक, स्वास्थ्य, जिल्ला विकास समिति, गृह मन्त्रालय मार्फत् ५ करोड भन्दा बढी रकम दिएको स्रोतको दावी छ।
कोइरालाले अर्थ मन्त्री भएको झण्डैं चार महिनाको अवधिमा आफू उपाध्यक्ष रहेको ट्रष्टका लागि उक्त रकम दिलाएका हुन्।
'सिधै ट्रष्टको खातामा नदिई काठमाडौं र भक्तपुरको उपभोक्ता समिति वा जिल्लागत कार्यालय मार्फत पैसा छुट्टाइएको छ,' अर्थ स्रोतले भन्यो, 'मन्त्रीज्यू स्वामीभक्त भएकाले मिलेसम्म चढाइरहनुभएको छ।'
त्यो मध्ये सबैभन्दा बढि रकम जलउत्पन्न नियन्त्रणका नाममा छुट्टिएको छ। २६ लाख इष्टिमेट भएको तटवन्धका लागि मन्त्रीले जेठ र असारमा ३ करोड ५० लाख दिने निर्णय गरेका छन्। दार्चुला वा सुदुरपश्चिका बाढी पिडितको निकासा रोकेर पनि अर्थले उक्त रकम आश्रमलाई 'फास्ट ट्रयाक'बाट दिइरहेको छ।
स्वामीले यसपाला मात्र सरकारको 'फेवर' पाएका भने होइनन्। सामुदायिक वन मासेर बनेको आश्रममा केहि वर्षदेखि सरकारी लगानी ओइरिरहेको छ।
विशेषगरि स्वामी/आश्रमले अख्तियार दुरुपयोग अनुसन्धान आयोग, भौतिक योजना, सिँचाई, स्थानीय विकास मन्त्रालयबाट बजेट पाउँदै आएको छ।
कोइराला जस्तै ती निकायका सचिवले पनि 'आफ्नै हात जगन्नाथ' शैलीमा सरकारी ढुकुटीबाट आश्रमलाई लाभ पुर्याएको देखिन्छ। सरकारी उच्च अधिकारीले धार्मिक आस्थाले निर्णय गरेकै भएपनि उनीहरु पदीय जिम्मेवारीबाट भने चुकेका छन्। 'कन्फ्िलक्ट अफ इन्टरेष्ट' छर्लङ् देखिन्छ।
आश्रममा सडक, पुल सुविधा पुर्याउन तत्कालिन भौतिक सचिव कडरिया दिलोज्यानले लागेका थिए। 'आश्रम मात्र हैन काठमाडौं र भक्तपुर जोड्ने पर्यटन सडकको रुपमा विकास गर्ने हेतुले पुल र सडक बनाएका हौँ,' हालका भौतिक योजना सचिव तुलसी सिटौलाले भने, 'कडरिया सचिवज्यूकै पालामा योजना अघि बढेको हो।'
कडरिया ट्रष्टको महासचिव छन्। आश्रमलाई कुनै न कुनै रुपमा सहयोग पुर्याएका अख्तियारका पूर्वप्रमुख आयुक्त भगवतिप्रसाद काफ्ले, पूर्व सिँचाई सचिवद्वय ताना गौतम र विन्द्रा हाडा भने पदाधिकारी छैनन्।
ट्रष्टको स्रोत सरकारी बजेट मात्र होइन। ६ सय भन्दा बढि भक्तले पनि करोडौं रुपैयाँ दान गरेको विवरण ट्रष्टले प्रकाशन गरेको मुक्तिनाथ सन्देश वैशाख अंकमा छापिएको छ।
आश्रममा प्रहरी, इञ्जियिनर, यातायात, मालपोत, कर, भन्सार, यातायात लगायत कर्मचारीको आहोरदोहोर बढी हुन्छ। लोकमानसिंह कार्की अख्तियार प्रमुख भएपछि आश्रममा भक्तहरुको घुँइचो झन् बढेको छ।
माओवादी अध्यक्ष प्रचण्ड निकट व्यापारी अजय सुमार्गी ट्रष्टका वरिष्ठ उपाध्यक्ष छन्। विभिन्न क्षेत्रका भक्तहरुका लागि आश्रम सुमार्गीसँग हिमचिम बढाउने थलो पनि बनेको छ।
अर्थमन्त्री कोइराला, कांग्रेस नेता दीपकुमार उपाध्याय, पूर्व प्रहरी आइजीपीहरु लगायतले पनि आफ्नो पहुँच प्रयोग गरेर स्वामीको 'चरणकमलमा' सरकारी कोषबाट रकम दिलाउने गरेको स्रोतको दावी छ।
वर्तमान सरकारले अस्पताल निर्माण र स्वामीको सुरक्षाका लागि सशस्त्रको बेस क्याम्प राख्ने निर्णय गरेर अर्को सहयोग गरेको आश्रमको कामधाम रेखदेख गर्ने त्रिविक्रम गरागाँइले बताए।
मन्त्रिपरिषद्का अध्यक्ष खिलराज रेग्मीले त्यहाँ अघिल्लो शुक्रबार मुक्तिनाथ अस्पताल शिलान्यास गरेका थिए। त्यसका लागि कोइरालाले नै ५० लाख रुपैयाँ निकासा गराएको स्वास्थ्य मन्त्रालय स्रोतले जानकारी दिएको छ।
रेग्मीले त्यही दिन स्वामीको सुरक्षाको लागि सशस्त्र बेस राख्ने भनि भवन पनि शिलान्यास गरेका छन्। अर्थले गृहलाई थप बजेट उपलव्ध गराएर यो काम फत्ते गराएको हो। अहिले स्वामी र आश्रमको सुरक्षार्थ ७ जाना जनपद प्रहरी खटिएका छन्। अव त्यसलाई कम्तीमा ५० पुर्याउन लागिएको छ।
आश्रम घोटाला प्रकरण
घोटाला श्रृखला ३: हिजो राजाको नाममा आज प्रचण्डको नाममा वन मास्दै स्वामी कमलनयनाचार्य
घोटाला श्रृखला २: भक्त लोकमानको हवाला दिँदै साढे २ करोडको किर्ते बिल बनाउन दबाब
घोटाला श्रृखला १: अर्थमन्त्रीका गुरुलाई बिनाबजेट ३ करोड ५० लाख, बाढीपीडित आठ जिल्लामा सुको गएन