आश्रम घोटाला प्रकरण:
जति तन्काउँदा पनि १ करोड रुपैयाँभन्दा बढीको बिल नबनेको तटबन्ध निर्माणमा ३ करोड ५० लाख भुक्तानी गर्न दबाब परेको भन्दै इञ्जिनियरहरु विभाग र मन्त्रालयको शरणमा पुगेका छन्।
स्वामी कमलनयनाचार्यको भक्तपुर छालिङस्थित आश्रममा करिब १ सय ५० मिटर तटबन्धको नाममा साढे ३ करोड भुक्तानी गर्न चौतर्फी दबाब परेपछि उनीहरुले हाकिम गुहारेका हुन्।
स्वामीले आफ्ना भक्तहरु अख्तियार प्रमुख लोकमानसिंह कार्की, अर्थमन्त्री शंकरप्रसाद कोइराला, सिँचाइमन्त्री उमाकान्त झा लगायतको हवाला दिँदै भुक्तानी दिन दबाब दिइरहेका छन्।
'भक्तहरुले आश्रमको ट्रस्टलाई दक्षिणा होस् भनेर बजेट हाल्दिएका हुन्,' बाबाले इञ्जिनियरहरुलाई भन्ने गरेका छन्, 'हामी छौं कतैबाट केही हुन्न।'
स्वामी कमलनयनाचार्यको आश्रम पश्चिमको गड्डे खोलामा तटबन्ध निर्माणका लागि अर्थ मन्त्रालयले जेठमा २ करोड र असारमा १ करोड ५० लाख रुपैयाँ दिएको थियो।
जलउत्पन्न प्रकोप नियन्त्रण विभागअन्तर्गत आयोजनाले स्वामीको तजबिजमा बनेको सातवटा उपभोक्ता समिति मार्फत् तार जाली, रिटेनिङ वाल लगायतको काम गरिरहेको छ।
जेठ बीचतिर सुरु भएको कामको गुणस्तर कमजोर भएको र १ करोडको बिल नै चर्को भनी चिन्तित इञ्जिनियरहरुमा अर्को अढाई करोड भुक्तानी दिनुपर्ने अवस्था आएपछि 'भागाभाग' जस्तै भएको छ।
६० लाखभन्दा बढीको काममा टेन्डर गर्नुपर्ने प्रावधान छल्न सातवटा उपभोक्ता समिति बनाइएको आयोजनका कर्मचारीहरुले बताएका छन्। स्वामीकै तजबिजमा उपभोक्ता समिति बनेको छ।
थोरै कामको धेरै बिल बनाएर उपभोक्ता समितिलाई भुक्तानी गरेको देखाउने र बचत आश्रमको ट्रस्टमा जम्मा गर्ने काम भइरहेको जानकारहरुले बताए।
जलउत्पन्न प्रकोप नियन्त्रण डिभिजन भक्तपुरले उक्त कामलाई गत वर्ष २६ लाख रुपैयाँ इस्टमेट गरेको थियो। तैपनि आवश्यक नठानेर बजेटमा नपरेको उक्त कार्यक्रममा अर्थमन्त्री शंकरप्रसाद कोइरालाले दुई किस्तामा बजेट हाल्दिएका थिए। पहिले कार्यक्रम स्वीकृत भएर बजेट जाने सर्वमान्य पद्दति पनि यसमा अनुसरण गरिएको छैन।
'१ करोड रुपैयाँको कार्यक्रम स्वीकृत भयो, अर्को अढाई करोड आयो तर कार्यक्रम अझै स्वीकृत भएको छैन,' आयोजनाका कर्मचारीले भने।
मध्यबर्खामा हतारहतार थालिएको कामको गुणस्तर कम भएकाले आयोजना प्रमुख मधुकर राणा र इञ्जिनियरहरु चिन्तित छन्। उल्टो अढाई करोड भुक्तानी दिनुपर्ने परिवन्द पर्ने डरले उनीहरु यो साता विभागका महानिर्देशक प्रदीपराज पाण्डे र मन्त्रालयको प्रशासनिक नेतृत्वसमक्ष पुगेका छन्।
'अख्तियार प्रमुख, अर्थमन्त्री, सिँचाइमन्त्रीलाई सँगै राखेर स्वामीले पूरै पेमेन्ट दिनुपर्यो भनेका भन्यै छन्,' उनीहरुले दुखेसो गरेका छन्।
आयोजनामा खटिएका ७ जना इञ्जिनियर फसादमा परेका छन्। 'स्वामीले भनेअनुसार पेमेन्ट दिए हमीलाई भ्रष्टाचारको मुद्दा लाग्छ,' उनीहरु भन्छन्, 'पेमेन्ट नदिँदा अख्तियारदेखि आफ्नै मन्त्रीको आँखी हुने भइयो।'
असारमै कार्की, कोइराला र झा एक्लाएक्लै आश्रम पुगिसकेका छन्। स्वामीले उनीहरुकै सामुन्ने आयोजनाबाट खटिने इञ्जिनियरहरुलाई डाकेर 'जसरी हुन्छ पूरै भुक्तानी' दिनू भनी आदेश दिने गरेका छन्। 'अर्थमन्त्री कोइराला र सिँचाइमन्त्री झाले हेर्दिनु भन्छन्,' इञ्जिनियरहरुको गुनासो छ, 'हामीले अख्तियार लाग्छ भनेर स्वामीलाई उत्तर दिने गरेका छौं।'
स्वामीले भने कुनै हालतमा अख्तियार लाग्न नदिने आश्वासन दिएर बिल अझ बढाउन दबाब दिइरहेका छन्। 'प्रमुख आयुक्त भएपछि लोकमान मेरो आशिर्वाद लिएर मात्र प्रचण्ड र शेरबहादुरकोमा गएका हुन्,' स्वामीले दिएको आश्वासान उदृत गर्दै इञ्जिनियरहरुले भने, 'अख्तियारको कुनै धन्दा मान्नु पर्दैन।'
स्वामीले कामको रेखदेख गर्न खटाएका त्रिविक्रम गुरागाँईले पनि जसरी हुन्छ असार मसान्तभित्र पूरै बजेट सक्नुपर्ने अवस्था रहेको बताएका छन्। 'महाराजजीले साउनपछि जति पनि बजेट ल्याउन सकिहाल्नुहुन्छ,' उनले सेतोपाटीलाई भने, 'अहिले आएको बजेट जसरी हुन्छ असारमा सक्नैपर्ने जिम्मा मेरो छ।'
हेटौंडा निवासी गुरागाँई व्यापारी अजय सुमार्गीको सिफारिसमा आश्रमको विकास निर्माणको हेरालु बनेका हुन्।
यो पनि हेर्नुहोस्
