राप्रपा नेपालका अध्यक्ष कमल थापाले गृहमन्त्री बामदेब गौतमले भगवान र हिन्दुहरुको आस्थालाई खिल्ली उडाएको भन्दै सार्वजनिक रुपमा माफी माग्नुपर्ने बताएका छन्।
गृहमन्त्रीले हिजो दिएको अभिब्यक्तिको विरोधमा शनिबार राजधानीको रत्नपार्कस्थित शान्तीबाटिकामा आयोजित विरोध सभालाई सम्बोधन गर्दै अध्यक्ष थापाले गृहमन्त्री अपमानजनक ढंगले संसदमा प्रस्तुत हुँदा सम्पूर्ण हिन्दु धर्मवालम्बीको अपमान भएको भन्दै तत्काल सार्वजनिक रूपमा माफि माग्नुपर्ने बताए।
गौतमले भगवान र हिन्दुहरुको धार्मिक आस्थाको अपमान गर्ने प्रयास गर्दै हिन्दुहरुको खिल्ली उडाएको आरोप लगाए। उनले भोलि संसदमा गृहमन्त्रीले माफी मागेर आफ्ना अभिव्यक्ति नसच्याए समस्या समाधान नहुनेसमेत दाबी गरे।
‘दमनकारी नीति कायम गर्नुहुन्छ र भगवानप्रति गरेको व्यंङ्ग फिर्ता लिनु हुन्न भने यो संघर्ष बामदेवमा मात्र सिमित रहन्न’ उनले भने-‘सनातन हिन्दु राष्ट्र समाप्त गर्ने षड्यन्त्रको कडीका रुपमा लिन्छौं र हिन्दु राष्ट्र बचाउन देशव्यापी अभियान सुरु गर्छौं,’ सम्बोधन गर्दै थापाले भने।
उनले कार्यक्रमा प्रधानमन्त्री शुसील कोइरालालाई आग्रह गर्दै भने, ‘दमनकारी गृहमन्त्रीलाई तह लगाउनुस्, होइन भने आफूहरूले नै तह लगाउन यसले विद्रोहको रुप लिन्छ।’
गौतमले नैतिकताको कुरा गर्न नसुहाउने भन्दै थापाले प्रहरी सरुवा बढुवामा ब्रिफकेस संस्कृति भित्र्याएको आरोप लगाए।
उनले आर्धिक आस्थामाथि आक्रमण भएको भन्दै यस्तो बेला समेत चुप लागेर बस्न नहुँने बताए। गृहमन्त्री गौतम कस्ता मान्छे हुन् भन्ने आफूलाई मात्रै नभएर सम्पूर्ण नेपाली जनतालाई थाहा भएको भन्दै थापाले विभिन्न दलमा आवद्ध तथा हिन्दुवादी संघ संस्थालाई समेत एकजुट हुन आहृवान गरे।
थापाले गृहमन्त्रीले भगवान शिवलाई आतंकको रुपमा प्रस्तुत गर्न खाजेर अपमान गरेको आरोप लगाउँदै यो घटनाले धार्मिक युद्धको विजारोपण गरेको बताए।
यस घटनालाई आगोको झिल्को भएको बताउँदै यसलाई समयमा नै ननिभाए यसले क्रान्तिको रुप लिने चेतावनी दिएपनि उनले धार्मिक द्वन्द्व नचाहेको स्पष्ट पारे।
हिन्दु राज्यको माग राखेर काठमाडौको शान्ति बाटीकामा अनसन बस्दै आएकालाई प्रहरी दमन गरी हटाएको भन्दै आक्रोशित उनले हिन्दु राष्ट्रको माग राख्दै शान्तीपूर्ण धर्नामा बसेका धर्म गुरुहरुलाई गिरफ्तार गरेर सरकारले ठूलो अपराध गरेको बताए।
