सभामुख सुवासचन्द्र नेम्वाङले आइतबार बिहान करिब साढे ११ बजे व्यवस्थापिका संसदको बैठक शुरु गर्नासाथ राप्रपा नेपालका सभासदहरुले ढ्याप ढ्याप टेबुल ठोकेर नियमापत्ति गरे।
नेम्वाङले राप्रपा नेपालका अध्यक्ष कमल थापालाई बोल्न समय दिए।
थापाले बैशाखदेखि शान्ति बाटिकामा अनसरत स्वामी श्रीनिवासलाई कात्तिक ११ गते प्रहरीले पक्राउ गरी नागरिकको शान्तिपूर्ण विरोधको संबैधानिक अधिकारमाथि अतिक्रमण गरेको आरोप लगाए।
उनले अनसनकारी धर्मगुरुलाई अपमानित ढंगले पक्राउ गरी धर्मग्रन्थ गिता नष्ट गरेर ९४ प्रतिशत नेपालीको धार्मिक आस्थामाथि अतिक्रमण र अपमान गरेको आरोप लगाए।
थापाले आगामी दिनमा कुनै पनि धर्ममाथि अतिक्रमण नगर्ने प्रतिबद्धता नआएसम्म सदन चल्न नदिने चेतावनी दिए।
त्यस लगत्तै जवाफका लागि उपप्रधानमन्त्री एवं गृहमन्त्री बामदेव गौतमले समय माग गरेपछि सभामुख नेम्वाङले बोल्न दिए।
गौतमले नेपाली जनतासँग सम्बन्धित विषयमा सभासदहरुले सदनमा कुरा उठाउनेे गरेको बताउँदै भने, 'यो सदनमा कुरा उठेपछि गृहमन्त्रीको नाताले कहिले माफि माग्दै त कहिले स्पष्टिकरण दिदैं आएको छु।'
उनले मुलुकमा कानुनको राज रहेको भन्दै कसैले पनि कुनै पनि कार्य गर्दा विद्यमान कानुन नियम र कार्यविधि बमोजिम गर्नु पर्ने बताए।
गौतमले थापाप्रति व्यंग्य गर्दै भने, 'कहिलेकाही हामीले भन्न हुँदैन तर पनि कानुन भन्दा फरक तबरले आफ्ना गतिविधि गर्ने गरेका छौं।' देश कानुन नियम बमोजिम चल्नुपर्छ भन्दै उनले भने, 'कानुन बमोजिमका गतिविधि नभए कानुनी राज्य स्थापित हुन सक्दैन र कानूनको पालना गर्न नसक्दा जनताले ठूलो नोक्सानी बेहोरी देश अराजकतामा जान्छ।'
थापाप्रति व्यंग्यात्मक शैलीमा फेरि भने, 'पहिलेदेखि नै आफ्नो बानी बसालेकाले त्यही बानीको पुनरावृत्त्ती गर्न खोजेमा राज्यले कानुनको पालना गर्न अगाडि बढ्नु पर्छ। तर राज्य पनि कानुन अनुसार नै चल्नुपर्छ। कोही पनि कानुन बाहिरबाट चल्न सक्दैन।'
गौतमले ९४ वा ८० वा ७० जति छन् हिन्दु धर्म, संस्कार मान्नेहरु सबैभन्दा बढी भएको बताए। त्यही समूहको कारण मुलुकमा अहिलेको परिवर्तन आएकोे उल्लेख गर्दै त्यसको स्थायित्वका लागि सोही समूह बढी जिम्मेवार हुनु पर्ने बताए।
उनले कुनै धर्म वा संस्कृति जोगाउन कुनै एक व्यक्ति, संस्था वा समुदायले मात्रै ठेक्का नलिएको बताए।
नेपालमा सबैले आफूले चाहेको धर्म संस्कार मान्न पाउने अधिकार भएको उल्लेख गर्दै संसारका कतिपय देशले धर्म अगालेजस्तै विगतमा नेपालमा राज्यले पनि धर्म अगालेको भएपनि अहिले त्यस्तो अवस्था नभएकेा बताए।
केही दिनअघि शान्ति बाटिकामा घटेको घटनाका बारे जानकारी दिँदै उनले स्वामी श्रीनिवास आर्चायको नामबाट चिनिने गुरु सहितका केही व्यक्तिले बैशाख ८ गतेदेखि रिले अनसन शुरु गरेको बताए।
अनसनका लागि बसेको स्थानको प्रहरीले सुरक्षा दिँदै आएको उल्लेख गर्दै गौतमले नेपालले सार्क शिखर सम्मेलनको तयारी गर्ने क्रममा सम्पूर्ण क्षेत्रमा सुरक्षा, सरसफाई गर्न र महानगरपालिका भित्रको अव्यवस्थालाई हटाउने जिम्मेवारी महानगरपालिकालाई दिएको बताए।
त्यसअनुसार महानगरपालिकाले शान्ति बाटिकमा भएका अनसनकारीलाई ठाँउ खाली गर्न आग्रह गर्दै आयो।
'रिले अनसन बसेर शान्ति बाटिका जुन कामका लागि बनेको हो त्यसमा बाधा पर्यो भनी गत महिनादेखि महानगरपालिकाले नियमबमोजिम पटक पटक हट्न अनुरोध गर्यो,' गौतमले भने, 'प्रत्येक दिन माइकिङ गरेपछि अरु अनसनकारी र विरोधकर्ता हटे पनि श्रीनिवासले त्यहाँबाट हट्नुको सट्टा त्यहाँ ८ फिट अग्लोे गुरु गोरखनाथको स्तम्भ खडा गर्न शुरु गरे।'
सात दिनको अल्टिमेटम दिँदा पनि दुइसय लिटर पानी अट्ने तामाको गाग्री, गोरखनाथको स्तम्भ, गोरखनाथको बाहानको रुपमा जिउँदो बाच्छो राखी गोरखनाथको मन्दिर बनाइ प्रवचन स्थल बनाउँदै सडकसम्म अबरोध गराएको उनले बताए।
अनेकन प्रयास बाबजूद पनि महानगरपालिकाले उनीहरुलाई हटाउन नसकेपछि प्रहरी र गृहमन्त्रालयलाई सहयोगका लागि अनुरोध गरेको उनले बताए।
'कात्तिक ११ गते बिहान प्रहरीले माइकिङ गर्दै त्यहाँबाट हट्न आग्रह गर्दा हातमा खुकुरी, बन्चरो, त्रिशुल हातमा लिएर आक्रामक शैलीमा प्रतिकारमा उत्रिए। उनीहरुको शैली हेर्दा लाग्थ्यो हातमा त्रिशुल लिएर साक्षात भगवान महादेव नै उपस्थित भए,' उनले भने।
गौतमले यत्ति भन्न के भ्याएका थिए, राप्रपा नेपालका सभासदहरु एकैपटक उठेर गौतम विरुद्ध नारावाजी गर्दै वेल घेराउ गर्न पुगे।
उनीहरुमध्ये सभासद दिनेश श्रेष्ठले 'भ्रष्ट्राचारी बामदेव गौतमसँग भिड्न तयार छौं' भन्दै नारा लगाए। उनलाई अरुले पनि साथ दिए। त्यसैगरी सभासद दिलनाथ गिरीले वर्तमान सरकारले धर्म गुरुमाथि आक्रमण गरी गिता नष्ट गरेर समग्र हिन्दुहरुको धार्मिक आस्थामाथि 'वलात्कार' गरेको आरोप लगाए।
सभासद् श्रेष्ठको भनाईप्रति संकेत गर्दै सभामुख नेम्वाङले सभासद्हरुले शब्द प्रयोग गर्दा संयमित र मर्यादित भाषा प्रयोग गर्नु पर्ने बताए।
राप्रपा सभासद् गृहमन्त्री गौतमले आफ्नो भनाई फिर्ता लिँदै माफी नमागेसम्म सदन चल्न नदिने अडान लिए। त्यसपछि सभामुख नेम्वाङले आधा घण्टाका लागि बैठक स्थगित गरे।
गौतमले आफू खाना खान र पार्टीको बैठकमा जानु पर्ने भन्दै साँझ ५ बजेमात्रै फर्कने जानकारी सभामुखलाई दिएर संसदबाट बाहिरिए।
सदनको कारबाही खुलाउन सरकारका तर्फबाट बनमन्त्री महेश आचार्य सहित केही नेता र राप्रपा नेपालका नेताबीच भएको वार्तामा राप्रपा नेपालका नेताले गौतमले माफी माग्नु पर्ने अडान लिए।
त्यसको प्रतिवाद गर्दै गौतमले आफूलाई भ्रष्टाचारी भन्ने राप्रपा नेपालका सभासद्ले माफी माग्नु पर्ने अडान लिए।
दिनभर प्रयास बाबजूद पनि सहमति हुन नसकेपछि सभामुख नेम्वाङले साँझ ५ बजे दोस्रो बैठक शुरु गरे। उक्त बैठकमा सत्तापक्ष र राप्रपा नेपालका सभासद्बीच चर्काचर्की भएर हात हालाहालको स्थिती बनेपछि आइतबारसम्मका लागि बैठक स्थगित भयो।
