'भद्रकाली छिँडीकी एउटी विमला...' भन्ने फिचर पढेर बल्ल उनको नाम थाहा भयो। मैले पहिलो पटक भेट्दा यी महिलाकी छोरी त्यस्तै तीन चार महिनाकी हुँदीहुन्। अपाङ्गताका कारण बच्चा र थाङ्ना मुश्किलले सम्हाल्थिन्।
म आफैँ पनि भर्खरै काठमाडौँ आएर संघर्ष गर्दै थिएँ। तैपनि यदि दिईन् भने यो बच्चालाई मिले कतै बालगृहमा नमिले आफैसँग राखेर हुर्काउँछु भन्ने सोँचेर धेरै पटक मागेँ, पढाईदिन्छु, ठूली भएपछि तिमीलाई पाल्छे भनेर पनि इसाराले सम्झाएँ तर मानिनन्।
त्यसपछि हप्ताको एक पटक जस्तो गएर सकेको थोरै थोरै पैसा दिन थालेँ।नानी खेल्न कुद्न सक्ने भएपछि आमालाई परेको सास्ती पनि मायालाग्दो हुन्थ्यो। त्यो बेला पनि तिमीलाई गाह्रो भयो म लान्छु भन्दा मानिनन्। आमाको मन भन्ने सोचेर त्यसपछि माग्नै छोडेँ। बरु बेला बेलामा गएर खेलाउने, खानेकुरा किनिदिने गर्थें। हिड्ने बेला नानीका आँखा छलेर भाग्नुपर्थ्यो। एकदिन जाँदा नानी मन्दिरमा आएका मानिससँग पैसा माग्दै गरेको देखेर मन साह्रै कटक्क खायो।
त्यसपछि नानीलाई र उनकी आमा दुबैलाई राखिदिने संस्थाको खोजीमा लागेँ। नाम लिन चाहन्न तर, आफूले चिनेका एक दुइ ओटा संस्थामा कुरा गर्दा एउटाले आमा अपाङ्ग भएकाले राख्न मिल्दैन भने अर्कोले बच्चा मात्रै भए राखीदिन्छु भने। यस्तैमा बिराटनगरका वृद्धाश्रम सञ्चालक जगत नेपालसँग पनि कुरा भयो। उहाँले अभिभावकले स्वीकृती दिए आमा छोरीलाई नै संरक्षण दिने वचन दिनुभयो।
यो लेखमा सानिमा भनी उल्लेख भएकी महिलालाई भेटेर कुरा गरेँ। उहाँले नपठाउने भन्नुभयो। हाम्रो कुरा सुनिरहेका मन्दिरमा आश्रय लिएर बसिरहेकाहरुले 'आमा छोरी दुबैलाई माग्ने बनाएर खान पाएकी छे, किन पठाउँथी' भन्ने प्रतिक्रिया दिए।
मेरो प्रयास पुगेन पनि होला, स्वीकार्छु तर आफ्नो कोशिस सफल नभएपछि मन पनि मार्दै गयो। केही समयको अन्तरालमा नानीलाई भेट्दा उसले क,ख भन्न जानी सकेकीरहिछ। उनैलाई सोद्धा स्कुल जाने गरेको थाहा पाएँ। तिनै सानीमा हुँ भन्नेले नै पढ्न पठाएकी रहिछिन्। नानीले तीनलाई मम्मी भन्दीरहिछिन् र आफ्नी आमालाई भने 'लाटी' भन्न सिकाईएको रहेछ।
अहिले एक्ली भएकी विमला आफूलाई दु:ख दिनेलाई इसाराले नै 'कसैको गर्भ धारण गरेर छोरो पाउँछु अनि तेस्ले तँलाई कुट्छ' भन्दै सराप्छिन् रे। मानसिक सन्तुलन गुमेका, मागेर गुजारा गर्ने तथा लागुपदार्थ सेवन गर्नेहरुबाट उनी दैनिकजसो यौन शोषणको शिकार हुने गरेको मन्दिरमै आश्रय लिएर बस्नेहरुले बताउँछन्। देखावटी रुपमा स्कुल भर्ना गरिएकी उनकी छोरीलाई सम्बन्धित निकायले उद्धार नगरे उनको पनि भविष्य सुरक्षित देख्दिनँ म।
यो पनि पढ्नुहोस :
भद्रकाली छिँडीकी एउटी 'बिमला...'