अभिनेत्री प्रियंका कार्की र चलचित्र पत्रकारबीच विवाद अन्ततः टुङ्गिएको छ।
चलचित्र पत्रकार संघले आइतबार एक विज्ञप्ति जारी गरी विवाद टुंगिएको जनाएको हो। वारडोव मालफङसन फोटो प्रकरणलाई लिएर अभिनेत्री कार्कीले फेसबुक स्टाटसमा चलचित्र पत्रकारलाई आशिष्ट भाषाको प्रयोग गरेपछि उनी विरुद्ध चलचित्र पत्रकार संघमा सदस्य जीवनकुमार पराजुलीले उजुरी हालेका थिए।
हेर्नुहोस् समाचारमा- प्रियंकालाई दशैदशा
प्रेसको मर्यादा भुल्न नहुने भन्ने विषयमा अभिनेत्री प्रियंका कार्कीसँग चलचित्र पत्रकार संघले बहस थालेको थियो । त्यसको जवाफमा अभिनेत्री प्रियंका कार्कीले तत्कालिन अवस्थामा आवेगमा आएर आफूले सो स्टाटस राखेको र प्रेसको सम्मान गर्दै स्टाटस हटाएर अभिव्यक्ति फिर्ता लिएको लिखित रूपमा दिएपछि विवाद टुङ्गिएको हो।
अभिनेत्री कार्कीले चलचित्र पत्रकार संघलाई लेखेको पत्रमा भनेकी छिन – ”सञ्चारकर्मी तथा पत्रकार साथीहरुसँग मेरो सम्बन्ध सधै राम्रो रहिआएको र आउँदो दिनहरुमा पनि यो सम्बन्ध कायमै राख्नको लागि, मैले लेखेको स्टाटसमा व्यक्तिगत रुपमा कसैको नाम नलिएको अवस्थामा पनि कसैले चित्त दुखाउँला वा कसैले व्यक्तिगत रुपमा लिनुहोला भन्ने सोच राखेर नै उक्त स्टाटस सम्मानपूर्वक आफ्नो शब्दहरु फिर्ता लिँदै हटाएँ।
जुन स्टाटसले गर्दा यो कुरा यहाँसम्म आइपुगेको छ, उक्त स्टाटस नै हटाएको अवस्थामा यो सम्पूर्ण मामला यहिँ नै टुङ्गिने मैले बुझेकी छु। कलाकार र पत्रकारको सहकार्य र मेलमिलापले नै चलचित्र उद्योगको विकासको पथमा लम्किने भएकोले, हाम्रो सहकार्य सधै रहिरहोस भन्ने कामना सहित यो निवेदन पेश गरेकी छु।‘
माथि उल्लेखित अभिव्यक्ति आफ्नो स्टाटस सच्याउदै अभिनेत्री प्रियंका कार्कीले शब्द फिर्ता लिएकोले यो विवाद टुङगाइएको जारी प्रेस रिलिजमा जनाइएको छ।