काठमाडौं, चैत २३ (सेतोपाटी)– एमाले महासचिव ईश्वर पोखरेलले सेना समायोजन विशेष समितिमा बाबुराम भट्टराईको नेतृत्वबारे प्रश्न उठाएपछि शुक्रबारको बैठक हुन सकेन । पोखरेलले ‘अहिलेसम्म प्रधानमन्त्री विशेष समिति संयोजक हुने गरेकोमा भट्टराईको हैसियत के हो’ भन्ने प्रश्न उठाएपछि बैठक स्थगित भएको थियो ।
सेनाको तालिम लिइरहेका ४२ जना लडाकुले स्वैच्छिक अवकाश चाहेकोबारे छलफल गर्न बसेको बैठक सुरु नभई सकिएको हो । ‘प्रचण्ड, माधव नेपाल, झलनाथ, तपार्इं स्वयं प्रधानमन्त्रीको हैसियतमा अध्यक्ष हुनुभएको हो,’ स्रोतका अनुसार पोखरेलले भट्टराईलाई भने, ‘तपाईं पदमुक्त भइसकेपछि पनि कसरी अध्यक्ष भन्ने प्रस्ट नभई बैठक बस्ने कुरै आउँदैन ।’
अरू सदस्यले समितिको लगभग अन्तिम बैठक भनी अड्को नथाप्न गरेको आग्रहलाई पोखरेलले चासो दिएनन् । ‘चार दलका शीर्ष नेताले बाबुराम नै अध्यक्ष हुन् भनी मलाई जानकारी नगराएसम्म म मान्नेवाला छैन,’ पोखरेलले भने ।