सरकारले कुलेखानी हेटौडा सुरुङ मार्ग निर्माणका लागि नेपाल पुर्वाधार विकास कम्पनीलाई अनुमति दिएको छ।
भौतिक पुर्वाधार तथा यातायात र सहरी विकास मन्त्रालयले मंगलबार पत्रकार सम्मेलन गरेर तीन वर्षमा काम सम्पन्न गर्नेगरी नेपाल पुर्वाधार विकास कम्पनीलाई अनुमति दिएको हो।
कार्यक्रममा भौतिक पुर्वाधार तथा यातायात र सहरी विकास मन्त्रालयका सचिव तुलसीप्रसाद सिटौलाले सरकारले निजी क्षेत्रसँग सहकार्य गरेर विकास निर्माणलाई अघि बढाएको बताए।
उनले निजी साझेदारीको अवधारणामा नेपालीको लगानी र संरक्षणमा परियोजना सञ्चालन गर्न सरकारले अनुमति दिएको बताए। नेपाल पुर्वाधार विकास कम्पनीका अध्यक्ष कुशकुमार जोशीले सरकारले निजी क्षेत्रलाई विस्वास गरेकाले आफूहरुलाई काम गर्न हौसला मिलेको बताए। उनले नेपालीको लगानीमा बन्न लागेको सबैभन्दा ठूलो परियोजना भएकाले इमान्दार भएर समयमै काम पूरा गर्ने प्रतिवद्धता समेत जनाएका थिए।
करिब ३४ करोड ५० लाख रुपैयाको लागतमा सन् २०१६ डिसेम्बरमा सम्पन्न गर्ने लक्ष्य लिएको काठमाडौं कुलेखानी हेटौडा सुरुङ मार्गमा गैरआवासीय नेपालीहरुले पनि सहयोग गर्ने बताइएको छ। परियोजनामा २८ वटा वाणिज्य बैङ्क र २ लाख भन्दा बढी नेपालीले लगानी गर्ने आश्वासन दिएको कम्पनीले जनाएको छ। ३० वर्ष पछि आफ्नो स्वामित्वमा आउने परियोजनाको कुल लागतको शुन्य दशमलव ५ प्रतिशत रकमको जमानत सरकारले लिएको छ। करिव ५८ किलोमिटर लम्बाइ रहेको सुरुङमार्ग सञ्चालनमा आएपछि एक घण्टामा काठमाडौंबाट हेटौडा पुग्न सकिने परियोजना सञ्चालक कम्पनीको दाबी गरेको छ।