नायिका रेखा थापा र नेकपा एमाले पोलिट्व्यूरो सदस्य एवम् पूर्व मन्त्री उर्मिला अर्याल एमाओवादीमा प्रवेश गरेका छन् । एकीकृत माओवादी मूख्यालय पेरिसडाडामा पार्टी अध्यक्ष पुष्पकमल दहालले टिका लगाएर दुबैलाई पार्टी प्रवेश गराएका हुन् ।
पार्टी प्रवेश भएपछि उर्मिला अर्यालले एमालेमा राम्रा र इमान्दार मान्छे छायाँमा परेको भन्दै राजनीतिक र शैद्धान्तिक रुपमा पतन भइसकेको एमाले छोडी माओवादीमा प्रवेश गरेको बताइन् ।
यस्तै नायिका रेखा थापाले एमाओवादी जनताको पार्टी भएकोले आफुपनि यसमा सम्माहित भएको बताइन् । उनले पार्टीले दिने जिम्मेवारी पूरा गर्न आफु तयार रहेको कार्यक्रममा बताउदै ऐतीहासिक पार्टीमा पार्टी प्रवेश गर्न पाउँदा खुसी लागेको बताइन् ।
अहिले चलचित्रको पर्दामार्फत मात्र आम जनमानसमा पुग्न नसकिएको कारणले पार्टी प्रवेशबाट अब हरेक नेपाली जनताका घर घरमा गएर सेवा गर्ने चाहन्छु, नायिका थापाले भनिन् । 'नायिका हुँदा मनोरञ्जन दिए अब देश र जनतालाई सेवा गर्न चाहन्छु,' थापाले भनिन् ।
माओवादी पार्टी जनताको र गरिबको पार्टी भएको बताउदै थापाले ति निमुखा जनतालाई सेवा गर्न आफू पार्टीमा प्रवेश गरेको बताइन् ।
उनले आफ्नो पारिवारिक पृष्ठभूमि पनि राजनीतिक रहेकाले अब एकीकृत माओवादीबाट समाजसेवा गर्ने प्रतिवद्धता जनाएकी थिइन् ।
यसैबीच कार्यक्रमलाई सम्बोधन गर्दै माओवादी अध्यक्ष पुष्पकमल दाहाल प्रचण्डले बृहत कम्युनिष्ट पार्टी बनाउने तयारीको रुपमा पार्टी प्रवेश कार्यक्रमलाई अगाडि बढाइएको बताए । उनले पार्टी प्रवेश गराउने कार्यक्रमलाई अझै शसक्त रुपमा लैजाने समेत जानकारी दिए ।
