धनुषा जिल्लाको निजि तथा आवासिय विद्यालयहरुमा नेपाल सरकारबाट स्वीकृती नलिएका लेखक तथा प्रकाशकहरुको पुस्तकबाट पठनपाठन भईरहदा पनि प्रशासनिक निकाय मौन छ ।
नेपाल सरकार शिक्षा मन्त्रालय पाठ्यक्रम विकास केन्द्रद्धारा शैक्षिक सत्र २०७० को लागि स्वीकृत गरिएको लेखक तथा प्रकाशकहरुको पुस्तक बाहेक विना स्वीकृत पुस्तकहरु अधिक मुल्यमा विक्रि वितरण हुने तथा निजि विद्यालयहरुले त्यसैबाट पठनपाठन गराउने कार्य निरन्तर रुपमा भईरहेको छ।
शैक्षिक वर्षको लागि स्वीकृत गरिएको मुल्य ५० हजार सम्म प्रकाशित हुने पुस्तकहरुको प्रतिपृष्ठ एक रंगको ०.९४.५ पैसा, दुई रंगको एक रुपैया १० पैसा, बहुरंगको १ रुपैया ३१ पैसा र ५ हजार भन्दा माथि प्रकाशित हुने पुस्तकहरुमा प्रतिपृष्ठ एक रंगको ८९.२५ पैसा, दुई रंगको ९९.२५ पैसा र बहुरंगको १ रुपैया १५ पैसा कायम गरिएको भएपनि सो विपरित स्वीकृत नलिएका प्रकाशनहरुले चर्को मुल्यमा अवैधानिक तवरले पुस्तक विक्रि गरिराखेको अभिभावक सदाशिव मिश्रले बताए। जनकपुर क्षेत्रमा निजि तथा आवासिय विद्यालयहरुले स्वीकृत विनाको लेखक प्रकाशनको पुस्तकहरु जस्तै मानव प्रकाशन, एम के प्रकाशन, ओनलाइन प्रकाशन, क्याम्पस प्रकाशन, ओझा प्रकाशनसंग कमिशन लिई विद्यार्थीहरुलाई सोही पुस्तक किन्न कर गर्ने गरेको अभिभावक संघ नेपाल जिल्ला कार्य समिति धनुषाका अध्यक्ष उदय चन्द्र साहले बताए ।
मनोमानि तरीकाले पुस्तक प्रकाशन गर्ने र मनपर्दी मुल्य राख्ने गरेका प्रकाशन समुह तथा लेखकहरुलाई कडा कारबाही गरिनुपर्ने तथा यी पुस्तकहरु खरिद गर्न कर गर्ने विद्यालयहरुलाई समेत अनुगमनको दायरामा ल्याई कानुन बमोजिम कार्वाही गर्न माग गर्दै अभिभावक संघले आईतबार धनुषा जिल्लाका प्रमुख जिल्ला अधिकारीलाई ज्ञापन पत्र समेत बुझाएका छन्।