'भ्रष्ट छवि' भएको भन्दै विवादमा तानिएका लोकमान सिंह कार्कीलाई सोमबार बिहान ११ बजेभित्रै अख्तियार प्रमुखमा सपथ खुवाइसक्न विभिन्न शक्तिकेन्द्रले दबाब दिए पनि राष्ट्रपति रामवरण यादवले तत्काललाई प्रक्रिया टारेका छन्।
संवैधानिक परिषद्ले आइतबार कार्कीको नाम सिफारिस गरेलगत्तै नागरिक समाज, विधार्थी लगायत विभिन्न क्षेत्रबाट विरोध सुरु भएपछि राष्ट्रपति कार्यालयले केही दिन सिफारिस अनुमोदन नगर्ने भएको हो। कानुनी परामर्शपछि मात्रै सिफारिस अनुमोदन गर्ने वा नगर्नेबारे निर्णय हुने राष्ट्रपति कार्यालय स्रोतले जानकारी दियो।
स्रोतका अनुसार सोमबार 'फस्ट आवर' मै सपथ खुवाइसक्न विभिन्न शक्तिकेन्द्रले राष्ट्रपति कार्यालयमाथि दबाब दिएको थियो। कार्कीको नियुक्तिविरुद्ध नागरिक समाजले थालेको आन्दोलन चर्कंदै गए 'थप अप्ठ्यारो स्थिति आउनसक्छ' र 'नियुक्ति प्रक्रिया नै भाँडिनसक्छ' भन्दै शक्तिकेन्द्रहरुले त्यसअगावै सपथ खुवाइहाल्न दबाब दिएको स्रोतले बतायो।
राष्ट्रपति कार्यालयका प्रेस सल्लाहकार राजेन्द्र दाहालले भने यस्तो दबाबबारे आफूलाई कुनै जानकारी नभएको बताए। परिषद्को सिफारिसबारे 'बुझबुझारथ' भइरहेको भन्दै दुई/तीन दिनमा मात्रै अनुमोदन हुने/नहुने टुंगो लाग्ने उनले जानकारी दिए।
'राष्ट्रपति कार्यालयमा सोमबार संवैधानिक परिषद्बाट आएको चिठ्ठी बुझबुझारथ भयो,' दाहालले सेतोपाटीसँग भने, 'प्रक्रिया पुर्याएर अनुमोदन गर्ने कि नगर्ने निर्णय लिन दुई/तीन दिन लाग्छ।'
उता सोमबार 'फस्टआवर'मै कार्कीविरुद्ध पेस भएको रिट सर्वोच्च अदालत प्रशासनले दिनभर छलफल गर्नुपर्ने भन्दै अल्झाएर राखेको थियो। ११ बजे अदालतमा पेस भएको रिट दिनभर छलफलमा राखिएपछि ५ बजे 'प्रक्रिया नपुगेको' भन्दै सर्वोच्चले अस्वीकार गरेको हो।सर्वोच्चले रिट दर्ता गर्न 'कार्की र संवैधानिक परिषद्लाई जानकारी गराएको निस्सा ल्याउनू' भनेको छ।