डिफन्डिङ च्याम्पियन गोर्खा ब्याइज, रुपन्देही भोजपुरमा जारी अन्तर्राष्ट्रिय आमन्त्रित भोजपुर गोल्डकपको फाइनलमा प्रवेश गरेको छ । सोमबार भएको अन्तिम सेमिफाइनल खेलमा काठमाडौको चर्च ब्याइज क्लबलाई १ का विरुद्ध २ गोले हराउँदै गोर्खा ब्याइज उपाधिको नजिक पुगेको हो ।
उपाधिका लागि बुधबार काठमाडौं-११ सँग प्रतिस्पर्धा गर्ने भएको छ । खेल शुरु भएको तेस्रो मिनेटमा राज पौडेललको गोलबाट गोर्खा ब्याइजले अग्रता लिएको थियो यस्तै खेलको ३९ औ मिनेटमा चर्च व्वाइजका लागि नाजी भिक्टोरले बराबरी गोल गरेका थिए । पहिलो हाफको इन्जुरी समयमा सौरभ मगरको फ्रि किकलाई कप्तान शिब श्रेष्ठले आकर्सक हेड गर्दै गोल गरेपछि रुपन्देही अन्तिम दुईमा प्रबेश गरेको हो ।
दुबै टोलीले गोल गर्ने केहि अवसर गुमाएका थिए । गोर्खा ब्याइजका तवान्बा स्टेफेन म्यान अफ द म्याच भए ।
यस अघि झापाको मुनाल क्लबलाई हराउँदै गोर्खा ब्याइज सेमिफाइनलमा प्रवेश गरेको थियो । त्यस्तै धरान फुटबल क्लबलाई हराउँदै चर्ज ब्याइज युनाइटेड सेमिफाइनलको यात्रा तय गरेको थियो । भोजपुर जिल्ला फुटबल संघको आयोजनमा भएको गोल्डकपको विजेताले दुई लाख नगद पुरस्कार पाउने छ । त्यस्तै उप विजेताले एक लाख नगद प्राप्त गर्नेछन् ।