एकीकृत नेकपा माओवादीका अध्यक्ष पुष्पकमल दाहालले ट्रेड युनियन अधिकारका नाममा कर्मचारीहरु जिम्मेवारी र कर्तव्यबाट विमुख हुँदै गएको भन्दै यो विषयले राजनीतिक नेतृत्वको तहमा प्रवेश पाएको बताएका छन्।
पार्टी निकट राष्ट्रिय कर्मचारी संगठन पशुपति क्षेत्र विकास कोष एकाइको चौथो अधिवेशन उद्घाटन गर्न आइतबार विहान पशुपति पुगेका एमाओवादी अध्यक्ष दाहालले ट्रेड युनियन अधिकारका नाममा कर्मचारीहरु अराजक र अनुशासनहीन बन्दै गइ सेवा प्रवाह नै प्रभावित बन्न थालेको बताए।
उनले जनतालाई प्रभावकारी सेवा दिने तथा आर्थिक अनुशासन प्रबर्द्धन गर्नेतिर कर्मचारी संगठनले कुनै भूमिका निर्वाह नगरेको आरोप लगाए। उनले अधिकारका नाममा अराजकता मौलाएकाले कर्मचारी संगठनका गतिविधि राजनीतिक तहमा एजेण्डाको विषय बनेको बताए।
सरकारी कर्मचारीहरुले सबैजसो कार्यालयमा पार्टी नै पिच्छे संगठन खोलेर ट्रेड युनियन अधिकारका नाममा राजनीति गर्दै आएका छन्। कर्मचारीहरु संगठनमा लाग्दाको प्रत्यक्ष असर सेवाग्राहीले पाउने सेवामा परिरहेको छ। एमाओवादी अध्यक्ष दाहालले संविधान जारी भएसँगै सबैका हक अधिकार सुनिश्चित भएकाले अब कसैले पनि आन्दोलन गर्न आवश्यक नरहेको र सबैले जिम्मेवारी पूरा गर्नतिर ध्यान केन्द्रीत गर्नुपर्ने बताए।