चारपटकको सहिद स्मारक 'ए' डिभिजन लिग च्याम्पियन एनआरटीले तत्कालका लागि ए डिभिजन लिग फुटबल नखेल्ने निर्णय गरेको छ । राजधानीमा शनिबार भएको साधारणसभाबाट क्लबले यो निर्णय गरेको हो ।
लिग जित्नका लागि स्टार खेलाडी भित्र्याउन भनेर लिएको झन्डै डेढ करोड रुपैयाँ ऋण तिर्न नसकेपछि ए डिभिजन लिग नखेल्ने निर्णय गरेको क्लबका महासचिव विनय प्रधानले बताए । 'आर्थिक रुपमा कमजोर बन्दै गएको क्लबले फुटबल खेलेर क्लबको ऋण तिर्न नसक्ने भएकाले आगामी २०७४ साल सम्मका लागि ए डिभिजन लिगमा सहभागि नहुने निर्णय गरियो' क्लबका महासचिव विनय प्रधानले भने ।
क्लबको संस्थागत तर्फ १ करोड ४० लाख र व्यक्तिगत तर्फ अझै धेरै ऋणा बाँकी रहेको भएकाले फुटबल खेलेरै सो रकम तिर्न नसक्ने भएकाले एनआरटी ए डिभिजनबाट पछि हटेको हो । क्लबले हिमालयन बैंकबाट वि.सं. २०६४ मा १ करोड ऋण लिएका थियो त्यसको दुई वर्षपछि ४० लाख थपेर एक करोड चालीस लाख ऋण पुर्याएको थियो ।
'फुटबल खेलेरै टिमको खर्च टार्न सक्ने अवस्था छैन । क्लबको सबै सम्पत्ति गुमाएर फुटबल खेल्ने सोच्न पनि सकिंदैन,' महासचिव प्रधानले भने, 'बरु फुटबल नखेली ऋण तिर्नेछौं । क्लबको सम्पत्ति जोगाएर फुटबलमा पछि र्फकन सकिन्छ ।'
त्रिपुरेश्वरमा चार रोपनी जग्गा र व्यापारिक भवन भएको एनआरटीले साँवा नबुझाएपछि कालोसूचीमा राख्ने बैंकको सूचना पाइसकेको छ ।
हालका लागि बी डिभिजन लिगमा सहभागिता मात्र जनाउने क्लबले जनाएको छ । हामी बी डिभिजन पनि जित्ने लक्ष्यले नखेल्ने महासचिव प्रधानले बताए । अबको ३-४ वर्षपछि क्लबले ऋण तिर्ने भएपछि मात्र वि डिभिजन जित्ने खेलाडी भित्र्याउने बताए ।
विसं १९९१ सालमा स्थापना भएको 'ए' डिभिजनकै सबैभन्दा पुरानो क्लबको अस्तित्व संकटमा परेको हो । क्लबले २ पटक एसियाली क्लब च्याम्पियनसिप र एक पटक एएफसी प्रेसिडेन्ट कपमा समेत सहभागिता जनाइसकेको छ ।
