नेकपा एमालेका वरिष्ठ नेता माधवकुमार नेपालले अब हुने निर्वाचनबाट आउने संविधानसभालाई नयाँ संविधान बनाउन चार वर्षसम्मको अवधि दिन नहुने बताएका छन् ।
मैतीदेवीस्थित आनन्दभूमि हाइस्कुलले नयाँ वर्षको अवसरमा आयोजित शुभकामना आदानप्रदान कार्यक्रमा बोल्दै नेता नेपालले फेरि पनि संविधान बनाउन चार वर्षको समय दिन खोज्नु नितान्त राजनीतिक स्वार्थको कुरा भएको बताए । नेता नेपालले आगामी मङ्सिरभित्र निर्वाचन गरेर छिटोभन्दा छिटो नयाँ संविधान ल्याउन सकेमा लोकतान्त्रिक आन्दोलनको उपलब्धिको रक्षा हुने बताए
उनले जातीय सङ्घीयताको पछि नलाग्न आग्रह गर्दै त्यसबाट कुनै फाइदा नपुग्ने र यसले उल्टै जातीय कटुता बढाउने र जनता फुटाउने कार्य गर्ने उल्लेख गरे ।
नेता नेपालले बदमासी गर्ने व्यक्तिलाई अख्तियार दुरुपयोग अनुसन्धान आयोगमा नियुक्ति नगर्न पनि ध्यानाकर्षण गराए ।
नेपालको शिक्षा नीति जनशक्ति उत्पादनमूलक, नैतिक प्रोत्साहनमुखी हुनुपर्नेमा जोड दिँदै विकासका नयाँ नयाँ संभावनाको विकासका लागि आन्तरिक र बाह्य पर्यटनमा पनि उत्तिकै महत्व दिन आग्रह गरेका थिए ।