ड्राइभर भिरालो ठाउँमा ट्याक्टर रोकेर पिसाब फेर्न निस्किँदा ट्याक्टर आफैँ गुडेर दुर्घटना हुँदा ताप्लेजुङको पाथीभरा मन्दिर दर्शन गर्न गएका पाँच जनाको मंगलबार राति मृत्यु भएको छ ।
सदरमुकाम फुङलिङ फर्कदै गरेको मे १ त २१०० नम्बरको ट्याक्टर दुर्घटना हुँदा चार जनाको घटनास्थलमै र एक जनाको उपचारका क्रममा जिल्ला अस्पताल ताप्लेजुङमा मृत्यु भएको प्रहरी नायब उपरीक्षक गोविन्द आचार्यले बताए । ‘१९ घाइतेमध्ये ६ जनाको अवस्था गम्भीर रहेकाले काठमाडौं उपचारमा लैजान हेलिकप्टर मगाइएको छ,’ आचार्यले सेतोपाटीसँग भने, ‘केहीबेरमै गम्भीर अवस्थाका बिरामीलाई काठमाडौं पठाइदैछ ।’
आचार्यका अनुसार पाथीभरा दर्शन गरेर फर्किने क्रममा रात परेपछि तल्लो फेदिबाट तीर्थयात्रु ट्रयाक्टरमा चढेका थिए । देउराली नजिक गुन्द्रे भन्ने स्थानको भिरालो सडकमा कबिर पौने ९ बजे रोकेर चालक पिसाब फेर्न गएपछि ट्याक्टर पल्टिएको थियो । खेजेनिम–७ बस्ने चालक भीमबहादुर शेर्पा फरार रहेको प्रहरीले जनाएको छ ।
मृत्यु हुनेहरू सबै काठमाडौंका हुन् । ईश्वरी थापा कलंकी, सुनधारास्थित हुलाक कार्यालयमा कार्यरत रेनु रञ्जीत मगर, मैया बुढाथोकी, नाम नखुलेका काठमाडौं निवासी दवाडी थरका एक व्यक्ति, र बनेपा निवासी गीता थापा छन् । गीताको जिल्ला अस्पताल ताप्लेजुङमा उपचार गर्ने क्रममा मृत्यु भएको प्रहरीले जनाएको छ ।
‘घाइतेको वयानअनुसार चालक भिरालो ठाउँमा रोकेर पिसाब फेर्न गएका थिए,’ प्रहरी नायब उपरीक्षक आचार्यले भने, ‘पाङ्ग्रामा ओ नलगाइएका कारण खचाखच मान्छे बसेको ट्याक्टर आफैं गुडेर पाँच सय मिटर तल खसेको थियो ।’
३५ जना तीर्थयात्री सबै काठमाडौंका थिए । तीमध्ये ९ जना फाल हानेर ज्यान जोगाएका थिए । अरू तीनजना पैदलै हिँड्दै थिए ।
सदरमुकाम फुङलिङबाट पाथीभरा मन्दिर १९ किलोमिटर टाढा पर्छ । सदरमुकामबाट आठ किलोमिटर टाढा सुकेटार विमानस्थलसम्म उनीहरूले बस लिएर गएका थिए । त्यो आठ किलोमिटरको बाटो पक्की छ ।
त्यहाँबाट कच्ची रोड छिचोल्दै ट्याक्टर र केही ट्याक्सी तल्लोफेदीसम्म पुग्छन् । तल्लो फेदीबाट तीन घन्टा पैदल हिँडेपछि पाथीभरा पुगिन्छ । उनीहरू तल्लो फेदीसम्म आइपुगेर ट्याक्टर चढेका थिए । ‘ट्याक्टरमा यात्रु चढ्न दिने गरेकै होइन,’ डिएसपी आचार्यले भने, ‘गह्रौं झोला र पैदल हिँड्ने बानी नपरेकाले उनीहरू आफैंले चालकलाई आग्रह गरेर विमानस्थलसम्म (गाडी राखेको स्थान)सम्म आउन खोजेका थिए ।’
(ताप्लेजुङबाट राजेन्द्र श्रेष्ठको सहयोगमा)
तस्बिर : राजेन्द्र श्रेष्ठ
