काठमाडौं, चैत २७ (सेतोपाटी)- तीन वर्षभन्दा लामो समयदेखि सर्वोच्च अदालतमा न्यायाधीश नियुक्ति हुन नसक्दा प्रधान न्यायाधीशलाई मुद्दा तोक्नमै समस्या हुन थालेको छ । प्रधानन्यायाधीश खिलराज रेग्मी मन्त्रिपरिषद्का अध्यक्ष भए पछि अहिले सर्वोच्च अदालतमा कामु प्रधानन्यायाधीश दामोदरप्रसाद शर्मा सहित जम्मा पाँच जाना न्यायाधीश मात्र छन् ।
एकपटक सुनुवाई भइसकेपछि वादी प्रतिवादी दुवै पक्षको बहस सुन्नु पर्ने संयुक्त इजलास तोक्न प्रधानन्यायाधीशलाई हम्मे हम्मे परेको छ । न्यायाधीश अभावले संवैधानिक निकायको पदाधिकारी नियुक्तिमा समेत असर गरेको छ ।
अख्तियारको प्रमुख आयुक्तमा लोकमानसिंह काकीको सम्भावित नियुक्ति रोक्न माग गर्दै परेको रिटमा कामु प्रधानन्यायाधीश दामोदरप्रसाद शर्माले जान्दाजान्दै आफ्नै इजलासमा पेशी तोके जुन उनले हेर्न मिल्दैन थियो ।
संवैधानिक परिषद्का पदेन सदस्य समेत रहेका शर्माले कार्कीविरुद्ध मुद्दा सुनुवाई गर्न मिल्दैन । त्यो जान्दा जान्दै पेशी तोक्नै पर्ने बाध्यताले उनले आफ्नो बेञ्चमा राखे । कार्की विरुद्धको मुद्दा सुनुवाइ वैशाख १० गतेलाई सरेको छ । परिषद्को सिफारिश संवैधानिक निकायका पदाधिकारीहरुको नियुक्ति हुन्छ ।
वरिष्ठ न्यायाधीश रामकुमारप्रसाद साहले मुद्दा हेर्न नमिल्ने बताएपपछि आइतबार पनि कार्कीको पेशी सरेको थियो ।
मंगलवार न्यायाधीश कल्याण श्रेष्ठ विदा बसेकाले कामु प्रधानन्यायाधीश समक्ष आफू र अन्तरिम आदेश जारी गर्ने सुशिला कार्कीलाई बाहेक अरुलाई तोक्ने उपाय थिएन ।
अर्का न्यायाधीश गिरीशचन्द्र लाल सोमबारदेखि नै सुनुवाई सुरु भएको अर्को मुद्दाको निरन्तरतामा लागेपछि शर्मा मुद्दा तोक्न विकल्प रहित भएका हुन् ।
सर्वोच्मा स्थापित परम्परा अनुसार सम्भवतः न्यायाधिश कार्कीले पनि यो मुद्दामा सुनुवाई गर्दिनन् । उनकै एकल इजालसले लोकमानलाई नियुक्त नगर्नु भनि अन्तरिम आदेश जारी गरेको थियो । एकपटक सुनुवाई गरिसकेपछि त्यही मुद्दा न्यायाधीशले सकेसम्म हेर्दैनन् ।
न्यायाधीश नियुक्ति, सरुवा बढुवा गर्ने निकाय न्याय परिषद्का अध्यक्ष दामोदरप्रसाद शर्माले निरन्तर परिषद् बैठक राखे पनि न्यायाधीश नियुक्ति हुनसकेको छैन । राष्ट्रपतिले संवैधानिक निकायमा पदाधिकारी नियुक्तिका लागि बाधा अड्काउ फुकाउको अध्यादेश जारी गरेको एक महिना बितिसक्दा पनि पदाधिकारीबीच एकरुपता आउन नसक्दा न्यायाधीश सिफारिस हुन सकेका छैनन् ।
‘न्यायाधीश अभावमा कामु प्रधानन्यायाधीशले जान्दाजान्दै आफ्नै इजलासमा मुद्दाको पेशी चढाउनुभएको छ,’ सर्वोच्चका सहप्रवक्ता हेमन्त रावलले भने, ‘यस्ता थुप्रै मुद्दामा न्यायाधीश तोक्न समस्या भएकोले धेरैजसो मुद्दा सुनुवाई हुनै सकेका छैनन् ।’
न्यायाधीश नियुक्तिका विषयमा हिजो बसेको परिषद् बैठक पनि बिना निर्णय टुंगिएको छ । परिषद्ले बार एशोसियसन र न्यायाधीश समाजलाई भेटेर न्यायाधीश नियुक्तिमा उनीहरुको राय सुन्ने बाहेक अरु कुनै काम गर्न सकेको छैन । न्यायाधीश नियुक्तिकै विषयमा आज ४ बजे परिषद्को औपचारिक बैठक बस्दै छ ।