गैरआवासीय नेपाली सङ्घ (एनआरएन) यूकको सदस्यता अनलाइनमार्फत वितरण गर्न सुरु गरिएको छ ।
आइतबार लन्डनमा एक कार्यक्रमबिच शुभारम्भ गरिएपछि अब एनआरएन युकेको सदस्यता अनलाइनमार्फत वितरण गरिने भएको हो । अनलाइन व्यवस्थाअन्तर्गत अब संस्थाको सदस्यताका लागि आवेदन दिन अनलाइन फारम भरेर शुल्क बुझाउन सकिनेछ । यसरी प्राप्त हुने आवेदनहरूको प्रक्रिया विगतको तुलनामा छिटो, छरितो र सहज बन्ने अपेक्षा छ ।
सदस्यता परिचयपत्र समयमै उपलब्ध हुने, सदस्यहरूको तथ्याङ्क सुरक्षित रहने, निर्वाचन केन्द्रित सदस्यता वितरणको विकृति हट्ने लगायतका आशा अनलाइन सदस्यता वितरणबाट गरिएको छ । अनलाइन सदस्यता लिँदा शुल्क पनि क्रेडिट, डेबिट कार्ड वा पेपालबाट अनलाइनमै बुझाउन सकिने व्यवस्था गराइएको छ ।
एनआरएन यू केलाई डिजिल व्यवस्थामा लैजाने अभियानको सुरुआती चरणमा सदस्यता अनलाइन गरिएको एनआरएन यूकेले जनाएको छ । भविष्यमा क्रमिक रुपमा अनलाइन मतदान लगायतका व्यवस्था पनि थप गर्ने योजना समेत सार्वजनिक गरिएको छ ।
अनलाइन सदस्यता वितरण शुभारम्भ कार्यक्रममा कार्यक्रमका संयोजक तथा एनआरएन युके उपमहासचिव विनय अधिकारीले एक पावरपोइन्ट प्रिजेन्टेसन गर्दै एनआरएन सदस्यताको औचित्य र महत्त्वबारे प्रष्टाएका थिए भने अनलाइन सदस्यताका लागि फारम भर्ने विधि र प्रक्रियाबारे एक छुट्टै भिडियो प्रिजेन्टेसन गरेका थिए । एनआरएन यू केका अध्यक्ष योगकुमार फगामीले अनलाइन व्यवस्थाको कार्यान्वयपछि संस्थाको सदस्यता थप सहज, छिटो छरितो र सस्तो बन्ने विश्वास व्यक्त गरेका छन् ।
कार्यक्रममा एनआरएन यू केका उपाध्यक्ष शेर सुनार, कोषाध्यक्ष सचिन श्रेष्ठ, प्रवक्ता रमेश सरांगकोटी लगायतले अनलाइन सदस्यता वितरण कार्यक्रमका बारेमा विभिन्न जानकारीहरू प्रस्तुत गरेका थिए ।
