नेपाल ओलम्पिक कमिटीले १४ औं दक्षिण एसियाली खेलकुद (साग) मा प्रस्तावित खेलका राष्ट्रिय संघहरूसँग ‘जुम’ को माध्यमबाट शुक्रबार बैठक गरेको छ।
आयोजक पाकिस्तानी ओलम्पिक कमिटीले दक्षिण एसियाली ओलम्पिक कमिटीलाई प्रतियोगितामा प्रस्तावित खेलबारे प्रतिक्रिया मागेको हुनाले यो बैठक बसेको हो।
ओलम्पिक कार्यालयमा सरकारको तर्फबाट प्रहरी राखेर प्रवेश निषेध गरेकाले ‘जुम’ को माध्यमबाट छलफल भएको हो।
बैठकमा सहभागी विभिन्न राष्ट्रिय संघका प्रतिनिधिहरूले आफ्नो स्पर्धा सम्बन्धमा थप गर्नु पर्ने, मिलाउनु पर्नेबारे विस्तृतमा प्रतिक्रिया दिएका थिए।
बैठकमा भएको छलफल अनुसार अब एनओसीले आयोजक पाकिस्तानको ओलम्पिक कमिटीलाई प्रतिक्रिया सहितको सुझाव पठाउने भएको छ।
पछिल्लो सयम नेपाल सरकार र ओलम्पिक कमिटीबीचको विवादका कारण ओलम्पिक भवनमा प्रहरीले निगरानी गर्दै आएको छ।
जीवनराम श्रेष्ठले आफू तेस्रो कार्यकालका लागि अध्यक्ष बन्नका लागि विधान संशोधन गर्न गरेको विशेष साधरणसभा र निर्वाचन अवैधानिक भएको सरकारको भनाइ छ।
यो विवाद एसियाली ओलम्पिक काउन्सिल र अन्तर्राष्ट्रिय ओलम्पिक कमिटीमा समेत पुगेको थियो। पछिल्लो समय एसियली ओलम्पिक काउन्सिलले युवा तथा खेलकुद मन्त्री तेजुलाल चौधरीलाई ओलम्पिकमा हस्तक्षेप नगर्न पत्र पठाएको सार्वजनिक भएको थियो।
-1742801159.jpg)
